Sənaye və energetika

Ana səhifə

Azərbaycanın kimya sənayesində istehsal 20% artıb

21 dekabr 2013 15:38 (UTC +04:00)

Bakı. Aqşin Rafiqoğlu – APA-Economics. Bu ilin yanvar-noyabr aylarında Azərbaycanda kimya sənayesi, əczaçılıq məhsulları, rezin və plastmas məmulatların istehsalı müəssisələri tərəfindən 244,3 mln. manatlıq məhsul istehsal edilib.

«APA-Economics»in Dövlət Statistika Komitəsinə istinadən verdiyi məlumata görə, ötən ilin 11 ayı ilə müqayisədə kimya sənayesində 19,9%, əczaçılıq məhsullarının istehsalında 14,9% artım, rezin və plastmas məmulatların istehsalında isə 6,7% azalma müşahidə olunub.

Əsas kimya məhsullarından izopropil spirtinin istehsalı 2,1 dəfə, polietilenin istehsalı 15,5%, lak-boya məmulatlarının istehsalı 28,6%, propilenin istehsalı isə 3,4% artıb.

Həmçinin, rezin və plastmas məmulatlarından polimer örtüklərin istehsalı 35,6%, məsaməli poliuretan lövhələrinin istehsalı 7,7% və polietilen boruların istehsalı 2,6% artıb.