Maliyyə

Ana səhifə

Maliyyə

Maliyyə Nazirliyində Beynəlxalq Valyuta Fondunun nümayəndə heyəti ilə görüş keçirilib - FOTO

08 noyabr 2013 16:21 (UTC +04:00)

Bakı - APA-Economics. Bu gün Azərbaycanın maliyyə naziri Samir Şərifov Beynəlxalq Valyuta Fondunun (BVF) Azərbaycan üzrə missiyasının rəhbəri Raca Almarzoqini və onu müşayiət edən nümayəndə heyətinin üzvlərini qəbul edib.

Nazirliyin mətbuat xidmətindən APA-ya verilən məlumata görə, görüşdə BVF ilə mövcud əməkdaşlıq əlaqələrinin vəziyyəti və perspektivlər müzakirə olunub, 2013-cü il və sonrakı illər üzrə ümumi iqtisadi göstəricilər, cari ilin dövlət büdcəsinin icrası və 2014-cü il üzrə dövlət büdcəsinin parametrləri barədə fikir mübadiləsi aparılıb, xərclər üzrə səmərəliliyin artırılması istiqamətində atılan addımlar qeyd olunub.

Ölkəmizdə bazar iqtisadiyyatı istiqamətində həyata keçirilən islahatların və makroiqtisadi sabitliyin təmin olunmasının önəmi vurğulanıb, Azərbaycanın prioritet elan etdiyi sahələrin daha da inkişaf etdirilməsi ilə bağlı məsələlər ətrafında fikir mübadiləsi aparılıb.

Samir Şərifov bildirib ki, dövlət başçısı İlham Əliyevin növbəti 5 il üçün Azərbaycan prezidenti seçilməsi ölkəmizdə sabitliyin və dayanıqlı sosial-iqtisadi siyasətin bundan sonra da davam etməsini təmin edəcək. Nazir qeyd edib ki, dövlət başçısı Azərbaycan iqtisadiyyatının keyfiyyətcə yeni mərhələyə qədəm qoyması ilə əlaqədar hökumət qarşısında qeyri-neft ümumi daxili məhsulun iki dəfəyədək artması vəzifəsini qoyub.

Azərbaycanda müşahidə olunan makroiqtisadi və maliyyə sabitliyi barədə danışan missiya rəhbəri Raca Almarzoqi qeyri-neft gəlirlərinin artırılması və qeyri-neft sektorunun davamlı inkişafı sahəsində əldə olunan nailiyyətləri müsbət qiymətləndirib.