Sosial

Ana səhifə

Sosial

Naxçıvan Ali Məclisinin sədri ali məktəblərə qəbul imtahanlarında yüksək bal toplayan tələbələrlə görüşüb

26 avqust 2008 08:53 (UTC +04:00)

Naxçıvan. C. Qurbanoğlu – APA. Naxçıvan Muxtar Respublikası (MR) Ali Məclisinin sədri Vasif Talıbov 2007/2008-ci tədris ilində orta ümumtəhsil məktəblərini bitirərək ali məktəblərə qəbul imtahanlarında yüksək bal toplayan tələbələrlə görüşüb. APA-nın məlumatına görə, Naxçıvan şəhərindəki “Gənclik” Mərkəzində təşkil olunan görüşdə çıxış edən V. Talıbov son 12 ildə regionda 29000 yerlik 91 ümumtəhsil məktəb binasının tikildiyini, 41 məktəb binasında isə əsaslı yenidənqurma işləri aparıldığını söyləyib.

Onun sözlərinə görə, hazırda MR-da 222 ümumtəhsil məktəbi fəaliyyət göstərir. Bu gün regionun orta ümumtəhsil məktəblərində 2290 ədəd kompüter dəsti olduğunu deyən Ali Məclis sədri hər 25 şagirdə 1 kompüter düşdüyünü, 100-dən artıq məktəbdə kompüterlərin birbaşa internet şəbəkəsinə qoşulduğunu bildirib. Sonra ali məktəblərə qəbul olan və 500-700 arasında bal toplayan 219 tələbəyə «Naxçıvan ensiklopediyası» kitabı və pul mükafatı təqdim olunub.

Qeyd edək ki, bu il Naxçıvan Muxtar Respublikasının 222 orta məktəbi üzrə 5571 nəfər ali məktəblərə qəbul üçün sənəd verib. 219 abituriyent 500-700 arası bal toplayıb. MR üzrə ilk dəfə olaraq Emil Əliyev III ixtisas qrupu üzrə 700 toplayaraq maksimum nəticə göstərib.

tələbə_qəbul_Naxçıvan