Sosial

Ana səhifə

Sosial

Azərbaycan Dövlət Neft Şirkətinin nümayəndə heyəti İstanbul və İzmirin klinikalarında azərbaycanlı həkimlər və tələbələrlə görüşüb

26 avqust 2008 12:30 (UTC +04:00)

Bakı. Nicat Mustafayev – APA-Economics. Azərbaycan Respublikası Dövlət Neft Şirkətinin (ARDNŞ) nümayəndə heyəti Regionların sosial-iqtisadi inkişafı Dövlət Proqramı çərçivəsində Türkiyənin İstanbul və İzmir şəhərlərinə səfər edib.
ARDNŞ-dan «APA-Economics»ə verilən məlumata görə, şirkətin kadr, rejim və informasiya texnologiyaları üzrə vitse-prezidenti Xalik Məmmədovun başçılıq etdiyi nümayəndə heyəti bu şəhərlərin və ətraf bölgələrin nüfuzlu klinikalarında üzmanlıq təcrübəsi keçən azərbaycanlı həkimlərlə görüşlər keçirib. ARDNŞ-in həyata keçirdiyi «Təqaüd proqramı» çərçivəsində təşkil olunmuş bu görüşlərdə 50-dən artıq həkimlə yanaşı 150-yə yaxın azərbaycanlı tələbə də iştirak edib. Görüşlər zamanı ARDNŞ təmsilçiləri yüksək elmi və təcrübi biliyə malik azərbaycanlı tibb mütəxəssislərinin buradakı durumu ilə maraqlanıb, onlara ARDNŞ-in vəsaiti hesabına Azərbaycanın bölgələrində inşa olunan Regional Müalicə-Diaqnostika Mərkəzləri haqqında ətraflı məlumat verib, bu perspektivli gənclərin Azərbaycana qayıtmaları, Regional Diaqnostika Mərkəzlərində işlə təmin olunmaları və digər məsələlərlə bağlı ətraflı fikir mübadiləsi aparıblar. Həmçinin qeyd olunub ki, bu görüşlər Türkiyə klinikalarında üzmanlıq keçən perspektivli mütəxəssislərlə ARDNŞ arasında uzun müddətdən bəri davam edən yazışmalar nəticəsində gerçəkləşib və bu əlaqələr gələcəkdə də davam etdiriləcək.
Qeyd edək ki, görüşlərdə ARDNŞ-in Sosial İnkişaf İdarəsinin səhiyyə departamentinin rəisi Fuad Əlizadə, Mərkəzi Neftçilər Xəstəxanasının baş həkimi Fəxrəddin Cavadov, xəstəxananın ürək-damar cərrahiyyəsi şöbəsinin rəhbəri Rəşad Mahmudov, eyni zamanda Azərbaycanın İstanbuldakı baş konsulu Səyyad Aran və ölkəmizin Türkiyədəki səfirliyinin məsul əməkdaşları da iştirak ediblər.