Sosial

Ana səhifə

Sosial

ARDNŞ-in ekoloji laboratoriyası beynəlxalq laboratoriya statusu alacaq

15 sentyabr 2008 11:09 (UTC +04:00)

Bakı. Rəşad Süleymanov – APA-Economics. ARDNŞ-in Ekologiya İdarəsinin laboratoriyası üçün Əzizbəyov rayonunun Balaxanı qəsəbəsi ərazisində beynəlxalq standartlara uyğun yeni bina inşa edilir. Bu barədə «APA-Economics»ə ARDNŞ-in Ekologiya İdarəsindən məlumat verilib.
Yeni tikilən laboratoriya binasının beynəlxalq standartlara cavab verən yüksək keyfiyyətli cihaz və avadanlıqlarla təchiz olunması üçün bu sahədə ixtisaslaşmış aparıcı şirkətlərlə danışıqlar aparılır. Yeniləşən Kompleks Tədqiqatlar Laboratoriyası müxtəlif laboratoriyaları özündə birləşdirməklə su, torpaq və hava nümunələrinin kimyəvi analizləri, fiziki-kimyəvi və spektral analizlər (xromatoqrafiya, spektrofotometriya və s.), qaz emissiyalarının təyini, hidrobioloji, mikrobioloji və ekotoksikoloji tədqiqatlar aparmaq, neft məhsullarının və metalların təyini kimi vəzifələri həyata keçirmək imkanında olacaq. Laboratoriyanın gələcəkdə İSO/MEK 17025 Beynəlxalq Laboratoriya sertifikatı alması planlaşdırılır.
Qeyd edək ki, Ekologiya İdarəsinin Kompleks Tədqiqatlar Laboratoriyası Azərbaycan Milli Sertifikatlaşdırma Sistemində akkreditasiyadan keçib.