Sosial

Ana səhifə

Sosial

Misir Mərdanov: “Azərbaycanda rus dilinin tədrisinə xarici dil kimi çox ciddi fikir verməliyik”

17 oktyabr 2008 12:34 (UTC +04:00)

Bakı. İlhamə İsabalayeva-APA. “Rus dilinin ikinci ana dili və xarici dil kimi öyrədilməsində fərqlər var. Keçmişdə rus dili ikinci ana dili olduğu üçün orta məktəblərdə bu fənnin tədrisinə daha çox saat ayrılırdı. İndi isə rus dili bizim üçün xarici dil hesab olunur. Rus dili xarici dil kimi öyrədildikdə bu fənnə ayrılan saatların azaldılmasından söhbət gedə bilməz. Çünki rus dili orta məktəblərdə ingilis, fransız, alman dili kimi tədris olunur”. APA-nın məlumatına görə, bu fikirləri Azərbaycanın təhsil naziri Misir Mərdanov orta məktəblərdə rus dilinin tədrisinə ayrılan saatların azaldılması ilə bağlı səslənən fikirlərə münasibət bildirərkən deyib.

M. Mərdanov bildirib ki, rus dili müəllimləri bu gün həmin fənnin tədrisinin yenə də əvvəlki kimi olacağını gözləyirlər: “Rus dilini əvvəl tədris etmiş insanların çoxu əvvəlki mövqedə qalmaqdadır. Biz isə çalışırıq ki, müəllimlərimiz saatsız qalmasın. Bunun üçün onlara yuxarı siniflərdə dərs demələrinə imkan yaratmışıq, amma 1-2 ildən sonra bu imkan da olmayacaq. Ona görə də gərək rus dili müəllimləri özləri də fəal olsunlar, valideynlər, şagirdlər arasında rus dilinin vacibliyindən danışsınlar, məktəblə birgə bu işin ciddiliyinə fikir versinlər”.

Nazir hesab edir ki, bu gün Azərbaycanda rus dilinin tədrisinə çox ciddi fikir vermək lazımdır: “Biz bilməliyik ki, rus dilini bilmədən irəli getməkdə çətinlik çəkərik. Çünki uzun illər Rusiya ilə əlaqələrimiz olub, bu ölkə həm də yaxın qonşumuzdur. Ona görə də Azərbaycanda rus dilinin tədrisinə həm orta, həm də digər təhsil müəssisələrində çox ciddi fikir verməliyik. Ancaq yalnız xarici dil kimi”.