Sosial

Ana səhifə

Sosial

Azərbaycanda Böyrəkköçürmə Mərkəzi fəaliyyət göstərəcək

17 oktyabr 2008 13:17 (UTC +04:00)

Bakı. İlhamə İsabalayeva – APA. Bu il fevralın 1-dən Səhiyyə Nazirliyinin tabeliyində olan bütün müalicə-profilaktika müəssisələrində pullu tibbi xidmətin ləğv edilməsi nəticəsində ölkə üzrə xəstəxanalara müraciətlərin sayı keçən ilə nisbətən 39 min, təcili yardım çağırışlarının sayı 21 min, ambulator gəlişlərin sayı 112 min artıb. APA-nın məlumatına görə, Azərbaycanın səhiyyə naziri Oqtay Şirəliyev bildirib ki, xəstələrin qida ilə təminatı məsələsi də həll olunur. Ötən ildən başlayaraq Bakı şəhərində və ətraf qəsəbələrdə yerləşən bütün xəstəxanalar mərkəzləşdirilmiş mətbəxlərdən gündə 3 dəfə tibb standartlarına uyğun yeməklə təmin edilir.
Nazir qeyd edib ki, xroniki böyrək çatışmazlığı olan xəstələrin 95 faizinin hemodializlə bağlı bütün xərclərini artıq dövlət öz üzərinə götürüb. O. Şirəliyevin sözlərinə görə, ölkənin müxtəlif regionlarında yaradılmış 16 ən müasir müalicə-diaqnostika mərkəzinin hər birində hemodializ müalicəsi nəzərdə tutulub. Bu mərkəzlər istifadəyə verildikdən sonra həmin müəssisələrdə də xəstələr dövlət hesabına müalicə olunacaq. Nazir hazırda həmin mərkəzlərin 8-nin fəaliyyət göstərdiyini deyib. O. Şirəliyev onu da əlavə edib ki, böyrək çatışmazlığı xəstələrinin probleminin ən müasir səviyyədə həlli üçün ölkə prezidentinin Ehtiyat Fondundan Respublika Uroloji Xəstəxanasına 15,7 milyon manat vəsait ayrılıb. Xəstəxananın əsaslı təmiri və lazımi tibbi cihazlarla təchizatı başa çatdıqdan sonra Azərbaycanda da Böyrəkköçürmə Mərkəzi fəaliyyətə başlayacaq.

Azərbaycan_səhiyyə