Sosial

Ana səhifə

Sosial

Azərbaycan Kür və Araz çaylarında keçirilən növbəti ekoloji monitorinqin nəticələrini açıqlayıb

17 oktyabr 2008 13:56 (UTC +04:00)

Bakı. İlhamə İsabalayeva – APA. Azərbaycan Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çayları, onların transsərhəd qollarının çirklənmə səviyyəsini öyrənmək məqsədilə oktyabrın I ongünlüyündə keçirdiyi növbəti monitorinqin nəticələrini açıqlayıb.
Nazirliyin mətbuat xidmətindən APA-ya verilən məlumata görə, monitorinq zamanı Kürün Gürcüstan ərazisindən transsərhəd çirklənməyə məruz qalan məntəqələrində suyun tərkibindəki spesifik çirkləndiricilərdən fenol və mis birləşmələrinin yol verilən qatılıq həddini (YVQH) dəfələrlə keçməsi müşahidə olunub. Kürün Şıxlı-2 məntəqəsində suyun əsas çirkləndiricilərindən fenollar 2, mis birləşmələri 4 dəfə, Ağstafaçayda mis birləşmələri 3 dəfə (fenollar norma daxilindədir), Ağstafaçay su anbarında isə fenollar 2, mis birləşmələri 3 dəfə YVQH-ni keçib.
Biogen maddələr və ammonium ionları norma daxilində olsa da, nitrit ionları Kür çayının Şıxlı-2 məntəqəsində 2 dəfə, Ağstafaçay məntəqəsində isə 1,9 dəfə YVQH-ni ötüb. Buna səbəb Gürcüstan və Ermənistan ərazisindən təmizlənmədən birbaşa su obyektlərinə axıdılan məişət, heyvandarlıq və sənaye müəssisələrinin çirkab sularıdır.
Ermənistanla transsərhəd olan Araz çayında da mis və fenolun miqdarı normadan dəfələrlə artıqdır. Çayın Horadiz, I Şahsevən, Bəhramtəpə məntəqələrində suyun əsas çirkləndiricilərindən fenollar 3, mis birləşmələri 4 dəfə YVQH-ni keçib.
Biogen maddələrdən nitrat və ammonium ionları norma daxilində olsa da, nitrit ionları Araz çayının Horadiz məntəqəsində 1,2 dəfə, Bəhramtəpədə 1,6 dəfə, I Şahsevəndə 1,8 dəfə YVQH-dən çox olub. Bunun da səbəbi Ermənistan ərazisindən təmizlənmədən birbaşa su obyektlərinə axıdılan çirkab sulardır.
Suyun oksigen rejimi isə bütün məntəqələrdə 5,28-6,64 mq/l arasında dəyişərək norma daxilində olub.