Sosial

Ana səhifə

Sosial

Ombudsman 1 saylı istintaq təcridxanasında aclıq keçirən məhbuslarla görüşüb

20 oktyabr 2008 14:37 (UTC +04:00)

Bakı. Hafiz Heydərov-APA. Azərbaycan İnsan Hüquqları üzrə Müvəkkili Elmira Süleymanova Ədliyyə Nazirliyi Penitensiar Xidmətinin Bayıldakı 1 saylı istintaq təcridxanasında aclıq aksiyası keçirən məhbuslarla görüşüb. Ombudsman Aparatından APA-ya verilən məlumata görə, E. Süleymanova orada aclıq edən şəxslərdən Mirqahir Zəkiyevlə görüşərək onunla təkbətək söhbət aparıb.

M. Zəkiyev istintaq təcridxanasında saxlandığı müddətdə onun hüquqlarının pozulmasına yol verilmədiyini söyləyib. O, həmçinin müəssisə əməkdaşlarının ona qarşı rəftarından narazı olmadığını da diqqətə çatdırıb. M.Zəkiyev aclıq etmələrinin səbəblərini isə barələrində məhkəmə prosesinin qeyri-obyektiv aparılması ilə əlaqələndirilib.

Ombudsman aclıq aksiyasının onların səhhətinə ziyan olduğunu və məsələnin həlli üçün səmərəli üsul olmadığını bildirib, bu səbəbdən aclığı dayandırmağa tövsiyə edib. O, Ağır Cinayətlərə Dair İşlər üzrə Məhkəmə tərəfindən qanun çərçivəsində qərar qəbul ediləcəyinə inandığını bildirib.

Həmin şəxsə hüquqları və Ombudsman haqqında Konstitusiya Qanununun tələbləri izah olunub. Müvəkkil həmçinin müəssisə rəhbərliyinə aclıq edənlərin vəziyyətini, səhhətini diqqətdə və həkim nəzarətində saxlamağı tövsiyə edib, saxlanılma şəraitinin daha da təkmilləşdirilməsi ilə bağlı tapşırıqlar verib.