Sosial

Ana səhifə

Sosial

Azərbaycanda neft və qaz hasil olunan ərazilərdə torpaqların neft çirklənmə səviyyəsi normanı on dəfələrlə üstələyir

05 noyabr 2008 09:53 (UTC +04:00)

Bakı. İlhamə İsabalayeva – APA-Economics. Azərbaycan Ekologiya və Təbii Sərvətlər Nazirliyi ölkə ərazisində torpaqların fon tərkibinin pestisidlərlə, ağır metallarla və neft məhsulları ilə çirklənməsinin öyrənilməsi məqsədilə «Bibiheybətneft», «Suraxanıneft», «Binəqədineft», Tağıyev və Əmirov adına Neft Qaz Çıxarma İdarələrinin (NQÇİ) ərazilərindən, «Balaxanıneft» NQÇİ-nin yaxınlığında yerləşən Sabunçu qəsəbəsinin ərazisindən və buruqlar arasından götürülmüş torpaq nümunələrində analizlər aparıb.
Nazirlikdən «APA-Economics»ə bildirilib ki, torpaqların çirklənməsinin monitorinqi üzrə götürülmüş 646 nümunə üzərində aparılan 2 801 kimyəvi analizin nəticələrinə görə, neft məhsullarının miqdarı «Binəqədineft» NQÇİ-nin ərazisində 11-25, «Balaxanıneft» NQÇİ-nin ərazisində 14-43, Əmirov adına NQÇİ-nin ərazisində 14-56, Suraxanı qəsəbəsinin ərazisində isə 4-13 dəfə normanı keçib.
Ətraf mühitin radiasiya fonu üzrə müşahidələr Bakı, Sumqayıt, Gəncə, Lənkəran, Şəki, Zaqatala, Quba, Naxçıvan, Ağcabədi, Ağstafa və «Neft Daşları»ndan götürülmüş 2 679 planşet nümunəsində aparılıb. Müşahidələrə görə, günəş şüalarının fəallığından asılı olaraq, ölkə ərazisində gündəlik radiasiya fonu mövsümlər üzrə dəyişkən olub. Belə ki, Abşeron yarımadasında radiasiya fonu 7-16 mkR/saat (təbii fon 7-14 mkR/saat) arasında dəyişib. Kiçik Qafqazda 5-14 mkR/saat (təbii fon 6-13 mkR/saat), Böyük Qafqazda 8-18 mkR/saat (təbii fon 9-26 mkR/saat), Aran rayonlarında 6-18 mkR/saat (təbii fon 5-18 mkR/saat), Lənkəran bölgəsində 6-16 mkR/saat (təbii fon 7-17 mkR/saat), Naxçıvan MR-da 8-15 mkR/saat (təbii fon 12-20 mkR/saat) radiasiya fonu qeydə alınıb.