Sosial

Ana səhifə

Sosial

Mart ayında Azərbaycan ərazisində dəyişkən hava şəraiti müşahidə olunacaq

03 mart 2009 11:05 (UTC +04:00)

Bakı. İlhamə İsabalayeva - APA. Azərbaycan ərazisində keçid dövrünə xas olaraq, mart ayında hava şəraitinin tez-tez dəyişməsi müşahidə olunacaq. Ekologiya və Təbii Sərvətlər Nazirliyinin Milli Hidrometeorologiya Departamentinin direktor müavini Umayra Tağıyeva APA-ya bildirib ki, nisbətən mülayim günlər soyuq atmosfer cəbhələrinin keçməsi ilə əlaqədar yağmurlu günlərlə əvəz olunacaq. Ay ərzində ümumi temperatur rejiminin iqlim normasına yaxın, bəzi yerlərdə 1 dərəcə yüksək olacağı gözlənilir. Aylıq yağıntının miqdarının iqlim normasından çox, bəzi yerlərdə isə normaya yaxın olacağı ehtimal edilir.

Mart ayı ərzində Bakı və Abşeron yarımadasında havanın orta aylıq temperaturunun 6-8 dərəcə isti olacağı gözlənilir ki, bu da iqlim normasına yaxın və 1 dərəcə yüksəkdir. Gecələr havanın temperaturu 3-7, gündüzlər 7-12 dərəcə isti olacaq, üçüncü ongünlükdə temperatur 15-19 dərəcəyədək yüksələcək. Aylıq yağıntının miqdarının iqlim normasından yaxın, bəzi yerlərdə isə bir qədər çox (norma 20-27 mm) olacağı proqnozlaşdırılır.

Naxçıvan Muxtar Respublikasında havanın orta aylıq temperaturunun 5-7 dərəcə isti, ayın sonunda 9-13 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr 2-7 dərəcə isti, ayrı-ayrı günlərdə 1-6 dərəcə şaxta gözlənilir. Gündüzlər havanın temperaturu 9-14 dərəcə isti olacaq, ayrı-ayrı günlərdə 18-23 dərəcəyədək yüksələcək. Yağıntının aylıq miqdarının iqlim normasına yaxın (norma 22-44 mm) olacağı proqnozlaşdırılır.

Yuxarı Qarabağ-Xankəndi, Xocavənd, Zəngilan, Qubadlı, Şuşa, Xocalı, Laçın, Kəlbəcər, Daşkəsən-Gədəbəy zonalarında havanın orta aylıq temperaturunun 2-4 dərəcə isti, ayın əvvəllərində 2-5 dərəcə şaxta, ayın sonunda isə 6-8 dərəcə isti olacağı gözlənilir. Orta aylıq temperatur isə iqlim normasına yaxın və normadan bir qədər yüksək olacaq. Gecələr 1-6 dərəcə şaxta olacaq, ayrı-ayrı günlərdə mənfi 8 dərəcəyədək enəcək, ayın sonunda 1-5 dərəcə isti təşkil edəcək. Gündüzlər 5-10 dərəcə isti, birinci ongünlükdə 0-4 dərəcə şaxta olacağı, ayın sonunda isə temperaturun 12-15 dərəcəyədək yüksələcəyi gözlənilir. Yağıntının aylıq miqdarı iqlim normasına yaxın (norma 41-52 mm) və bir qədər çox olacaq.

Qazax-Gəncə, Tərtər, Ağdam-Füzuli-Cəbrayılda havanın orta aylıq temperaturu 4-6 dərəcə isti gözlənilir ki, bu da iqlim normasına yaxındır. Gecələr 1 dərəcə şaxtadan 4 dərəcəyədək isti, üçüncü ongünlükdə isə 5-8 dərəcə isti olacaq. Gündüzlər 7-12 dərəcə isti olacaq, üçüncü ongünlükdə temperatur 15-18 dərəcəyədək yüksələcək. Aylıq yağıntının miqdarının iqlim normasından çox (norma 19-28 mm) olacağı proqnozlaşdırılır.

Balakən-Şəki-Zaqatala-Qəbələ, Şamaxı-İsmayıllı, Xızı, Siyəzən-Dəvəçi, Quba-Qusar-Xaçmazda havanın orta aylıq temperaturu 3-5 dərəcə isti, ayın əvvəlində 0-3 dərəcə şaxta, ayın sonunda isə 6-8 dərəcə isti gözlənilir. Orta aylıq temperatur iqlim normasına yaxın və 1 dərəcə yüksək olacaq. Gecələr 2 dərəcə şaxtadan 3 dərəcəyədək isti, birinci ongünlükdə bəzi yerlərdə 3-6 dərəcə şaxta, üçüncü ongünlükdə 4-6 dərəcə isti proqnozlaşdırılır.

Gündüzlər 5-10 dərəcə isti olacağı, üçüncü ongünlükdə isə temperaturun 12-17 dərəcəyədək yüksələcəyi gözlənilir. Yağıntının aylıq miqdarı iqlim normasına yaxın və bir qədər (norma 24-90 mm) çox olacaq.

Mərkəzi Aran rayonları - Mingəçevir, Yevlax, Kürdəmir, İmişli, Beyləqan, Sabirabad, Saatlı, Şirvan, Salyan, Neftçalada havanın orta aylıq temperaturunun 7-8 dərəcə isti olacağı gözlənilir ki, bu da iqlim normasına yaxındır. Gecələr 3-7, gündüzlər 9-14 dərəcə isti olacaq, üçüncü ongünlükdə temperatur 16-20 dərəcəyədək yüksələcək. Yağıntının aylıq miqdarının iqlim normasına yaxın (norma 24-45 mm) və bir qədər çox olacağı gözlənilir.

Masallı-Lənkəran-Astara-Lerik-Yardımlıda havanın orta ayrıq temperaturu 5-7 dərəcə isti, ayın sonunda 8-10 isti gözlənilir ki, bu da iqlim normasına yaxın və bir qədər yüksəkdir. Gecələr 2-6 dərəcə isti, gündüzlər 8-13 dərəcə isti olacağı, ayrı-ayrı günlərdə temperaturun 15-17 dərəcəyədək yüksələcəyi proqnozlaşdırılır. Yağıntının aylıq miqdarının iqlim normasına yaxın (norma 59-117 mm) və bir qədər çox olacağı gözlənilir.

hava