Sosial

Ana səhifə

Sosial

İçərişəhər məhv olmaq təhlükəsi olan abidələrin siyahısından çıxarılıb

27 iyun 2009 08:24 (UTC +04:00)

Sessiyada Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinin rəisi Mikayıl Cabbarovun rəhbərlik etdiyi nümayəndə heyəti də iştirak edir. Sessiyada digər məsələlərlə yanaşı, dünya şəhərsalma sənətinin nadir nümunəsi olan İçərişəhərin qorunub saxlanılması istiqamətində görülən tədbirlər müzakirə olunub. Son bir neçə ay ərzində İçərişəhərin idarəetmə sisteminin təkmilləşdirilməsi istiqamətində əlavə addımların atılması, “İçərişəhər” Dövlət Tarix-Memarlıq Qoruğunun mühafizə zonasının yaradılması barədə qərarın qəbul edilməsi və konservasiya üzrə Master Planın təqdimatının keçirilməsi müsbət hal kimi qeyd edilib və İçərişəhərin Təhlükədə olan Ümumdünya İrs Siyahısından çıxarılması üçün verilmiş bütün tövsiyələrin Azərbaycan hökuməti tərəfindən yerinə yetirildiyi təsdiqlənib.

Dünya İrs Komitəsinin 33-cü sessiyasının gündəliyinə İçərişəhərin məhv olmaq təhlükəsi olan Ümumdünya İrsi Siyahısından çıxarılması məsələsinə 2010-cu ildə baxılması barədə qərar layihəsi daxil edilib. Lakin Azərbaycan nümayəndə heyətinin rəhbəri M. Cabbarov tərəfindən İçərişəhərdə görülmüş işlər haqqında ətraflı məlumatına verilməsindən və müvafiq sənədlərin təqdim edilməsindən sonra ilkin qərar layihəsi dəyişdirilib və Komitəyə daxil olan bütün 21 ölkənin təmsilçiləri iyunun 25-də yekdilliklə İçərişəhərin Təhlükədə olan Ümumdünya İrsi Siyahısından çıxarılmasına səs veriblər. Qərarda, həmçinin, mədəni irsin qorunmasında Azərbaycanın əldə etdiyi uğurlar təqdirəlayiq hesab edilib və digər ölkələrə nümunə kimi göstərilib. Sessiya öz işini iyunun 30-dək davam etdirəcək.

Qeyd edək ki, 2000-ci ildən YUNESKO-nun “Dünya İrs Siyahısı”nda olan İçərişəhər 2003-cü ildə 21 ölkənin nümayəndələrindən ibarət Dünya İrs Komitəsinin qərarı ilə məhv olmaq təhlükəsi olan Ümumdünya İrs Siyahısına daxil edilib. O zaman bu qərarın qəbul olunmasına 2000-ci ilin noyabrın 25-də Bakı şəhərində baş vermiş güclü zəlzələnin törətdiyi nəticələr, İçərişəhərdə vahid idarəetmə sisteminin və lazımi nəzarətin olmamasından irəli gələn və memarlıq abidələri üçün təhlükə yaradan qeyri-qanuni tikinti işləri, həmçinin, İçərişəhərin qorunması və inkişaf planının qeyri-mövcudluğu səbəb olub. Bununla bağlı komitə Azərbaycan hökumətinə görülməli olan tədbirlərə dair tövsiyələrini təqdim edib. Azərbaycan prezidentinin sərəncamı əsasında bu istiqamətdə məqsədyönlü tədbirlər həyata keçirilməsinə başlanılıb. İdarənin fəaliyyəti müddətində ərazidə aparılan bütün tikinti işləri dayandırılıb, nəqliyyatın hərəkətinin tənzimlənməsi ilə bağlı müvafiq işlər görülməyə başlanıb, abidə və tarixi binaların inventarizasiyası aparılıb. Azərbaycana bir neçə dəfə səfər etmiş YUNESKO-nun və digər beynəlxalq təşkilatlarının ekspert qrupları hazırladıqları hesabatlarda Dünya İrs Komitəsi tərəfindən verilmiş tövsiyələrin yerinə yetirilməsini, o cümlədən Qoruğun idarə olunması üçün ayrıca dövlət qurumunun yaradılmasını və ona müvafiq səlahiyyətlərin verilməsini xüsusilə qeyd edib, abidələrin mühafizəsi ilə bağlı görülən tədbirləri yüksək qiymətləndirib.