Sosial

Ana səhifə

Sosial

Bakının Nizami rayonunda əhalinin sosial reabilitasiyası sahəsində aparılan işlərin nəticələri açıqlanıb

30 iyun 2009 11:06 (UTC +04:00)

Bakı. Aynur Vəliyeva – APA-Economics. Bu gün Bakı şəhəri Nizami rayonunun Əhalinin Sosial Müdafiəsi Mərkəzində sosial reabilitasiya üzrə işçi qrupunun iclası keçirilib.

Mərkəzin direktoru Əli Əliyevin «APA-Economics»ə verdiyi məlumata görə, işçi qrupunun hesabatına əsasən, son üç il ərzində sosial yardım sisteminin tətbiqi sahəsində görülən işlər nəticəsində 179 504 ailə (817 355 nəfər) dövlətdən ünvanlı yardım alır. Yardım alan ailələrin 77,8%-i dövlətdən ilk dəfə yardım alanlardır.

Ə.Əliyev bildirib ki, ötən üç ildə mexanizmin təkmilləşdirilməsi və yardım alan ailələrin əhatə dairəsinin genişləndirməsi, yardımların verilmə müddətinin 6 aydan 1 ilədək uzadılması, yardım almaq üçün təqdim olunan sənədlərin sayının azaldılması məqsədi ilə «Ünvanlı dövlət sosial yardımı haqqında» qanuna və mövcud qaydalara müvafiq əlavə və dəyişikliklər edilib. Bununla yanaşı, bütün ölkə ərazisini əhatə edən xüsusiləşdirilmiş korporativ lokal şəbəkə və bu şəbəkə vasitəsi ilə nazirlikdə 450 minə yaxın təyinat haqqında geniş məlumat bankı yaradılıb.

İclasda «Ünvanlı dövlət sosial yardımı haqqında» qanuna gələcəkdə edilə biləcək dəyişikliklər və ünvanlı sosial yardım və davamlı inkişaf, aztəminatlı ailələrin uşaqlarının yay tətilinin təşkili, «Erkən nikahların qarşısının alınması məqsədi ilə təbliğat kampaniyasının keçirilməsi Layihəsi»nin həyata keçirilməsi və digər məsələlər barədə məlumat verilib.

Ə.Əliyev təəssüflə qeyd edib ki, məktəblərdə aparılan «Erkən nikahların qarşısının alınması məqsədi ilə təbliğat kampaniyası» zamanı mərkəz bu prosesləri dəstəkləyən bir çox valideynlərlə rastlaşıb. Bununla yanaşı o bildirib ki, hazırda Nizami rayonunda yerləşən bir uşaq evində aparılan araşdırmalar nəticəsində müəyyən edilib ki, atılan uşaqların 24%-i erkən nikahlardan olan uşaqlardır.

Qeyd edək ki, Dünya Bankının «Pensiya və sosial təminat Layihəsi» çərçivəsində 6600 ailəni əhatə edən monitorinq keçirilib. Monitorinq nəticəsində aydın olub ki, ünvanlı sosial yardım alan ailələrin 86%-i əhalinin ən aşağı iki istehlak kateqoriyasına aiddir. Onların ən yoxsul 20%-nin gəlirlərinin yarıdan çoxunu dövlətdən alınan sosial yardım təşkil edir.