Sosial

Ana səhifə

Sosial

QAT bəzi regionlarda Şəhidlər xiyabanlarına qarşı hörmətsizlik və vandalizm nümayiş etdirilməsindən narahatdır

30 iyun 2009 13:16 (UTC +04:00)

Bakı. Hafiz Heydərov - APA. Qarabağ Azadlıq Təşkilatı (QAT) ölkənin bəzi regionlarında Şəhidlər xiyabanlarına qarşı hörmətsizlik və vandalizm nümayiş etdirilməsindən narahatdır. QAT-ın mətbuat xidmətindən APA-ya verilən məlumatda qeyd olunur ki, növbəti analoji hərəkət iyunun 29-da Ağsu şəhərində törədilib. Şəhərin Şahidlər xiyabanı yandırılıb, şəhid məzarları bərbad vəziyyətə salınıb.

Təşkilatın Ağsu şöbəsinin nümayəndələri aidiyyəti qurumlara müraciət etsə də, nəticəsi olmayıb.

Məlumatda, həmçinin, Ağsu rayon Polis Şöbəsinin rəis müavini Malik Məmmədovun məsələ ilə bağlı müraciət edən QAT üzvlərinə qarşı kobudluq etdiyi və şəhidlərin ünvanına nalayiq sözlər işlətdiyi qeyd edilir: “Biz hesab edirik ki, bu cür şəxslərin polis sıralarında qalması yolverilməzdir. Ümid edirik ki, Daxili İşlər Nazirliyi onun barəsində ölçü götürəcək. Əks halda, biz ölkənin Baş Prokurorluğuna və Ali Məhkəməsinə müraciət edəcəyik”.

Məlumatda QAT-ın fəallarının rayon ictimaiyyətinin nümayəndələri ilə birlikdə Şəhidlər xiyabanının abadlaşdırılması, yanğının nəticələrinin aradan qaldırılması istiqamətində iş apardığını bildirilir: “Bu yanğın təsadüfən törədilməyib və bu cür yanğınların yenidən törədilməsi ehtimalı böyükdür. Ona görə də hüquq-mühafizə orqanları ciddi araşdırmalar aparmalı, günahkarı aşkar etməli və cəzalandırmalıdır. Şəhidlər xiyabanına bu cür vəhşi münasibət şahidlərin ruhuna təhqirdir və bu münasibətlə heç bir halda barışmaq olmaz”.

Ağsu rayon Polis Şöbəsinin rəisi Natiq Məşədiyev isə APA-ya açıqlamasında QAT-ın məlumatını təkzib edib: “Əvvələ onu deməliyəm ki, yanğın baş verən yer Şəhidlər xiyabanının deyil, rayon qəbiristanlığının ərazisidir. Rayonun Şəhidlər xiyabanı bir müddət əvvəl kompleks şəkildə başqa yerə köçürülüb. Sözügedən məzarlığın ətrafında yanğın isə təsadüfən baş verib və məzarlara ciddi ziyan dəyməyib”.

Polis rəisi QAT üzvlərinin müavini Malik Məmmədovun qəbulunda olduqlarını təsdiqləyib: “Onlar Malik Məmmədovu yanğının qarşısını almamaqda günahlandırıblar. Rəis müavini də öz növbəsində onlara özlərinə aid işlərlə məşğul olmalarını və aidiyyəti qurumlara müraciət etmələrini tövsiyə edib. Təşkilatın üzvlərinə qarşı polis tərəfindən heç bir kobudluq edilməyib”.