Sosial

Ana səhifə

Sosial

ETSN 2 saylı Ərazi Ekologiya və Təbii Sərvətlər şöbəsi bu ilin 5 ayı ərzində 21 akt və protokol tərtib edib

01 iyul 2009 11:37 (UTC +04:00)

Bakı. Kəmalə Quliyeva - APA, Ekologiya və Təbii Sərvətlər Nazirliyinin (ETSN) 2 saylı Ərazi Ekologiya və Təbii Sərvətlər şöbəsi nəzarət etdiyi inzibati ərazilərdə (Qazax, Şəmkir, Gədəbəy, Tovuz, Ağstafa) “Ətraf mühitin mühafizəsi haqqında” qanunun tələblərinə müvafiq reyd və yoxlamalar keçirərək bu ilin 5 ayı ərzində 21 akt və protokol tərtib edib. ETSN-ın mətbuat xidmətindən APA-ya verilən məlumata görə, qanun pozuntusuna yol verdiklərinə görə hüquqi və fiziki şəxslərə qarşı ümumilikdə 8 iş üzrə 6700 manat məbləğində cərimə tətbiq edilib. Ətraf mühitə dəymiş ziyanla bağlı 6 iş üzrə 5412,2 manat məbləğində iddia qaldırılıb. İdarə və müəssisələrə 72 iş üzrə 5032 manat məbləğində ödəmə verilib.

Su mühafizəsi sahəsində idarə və müəssisələrə 10 iş üzrə 892 manat məbləğində ödəmə tətbiq edilib. Atmosfer havasının mühafizəsi sahəsində 4 akt tərtib edilib, 2 icrası məcburi olan göstəriş verilib. Müəssisə və təşkilatlara 32 iş üzrə 1440 manat məbləğində ödəmə tətbiq edilib. Torpağın mühafizəsi sahəsində 1 akt tərtib olunub və 1 icrası məcburi olan göstəriş verilib. Yerin təkinin mühafizəsi sahəsində idarə və təşkilatlara 2 iş üzrə 700 manat məbləğində ödəmə tətbiq edilib.

Ətraf mühitə qanunsuz məişət və istehsalat tullantılarının yerləşdirilməsinə görə 6 akt və protokol tərtib olunub, 5 iş üzrə 4200 manat məbləğində cərimə tətbiq edilib. İdarə və müəssisələrə isə 28 iş üzrə 2000 manat məbləğində ödəmə tətbiq olunub. Floranın mühafizəsi sahəsində 10 akt və protokol tərtib edilib, 4 iş üzrə 2500 manat məbləğində cərimə tətbiq olunub. Dəymiş ziyana görə 6 iş üzrə 5412,2 manat məbləğində iddia qaldırılıb.