Sosial

Ana səhifə

Sosial

«Azərbaycanda ictimai vəsaitlərlə bağlı məlumatın açıqlığının monitorinqi Layihəsi»nin nəticələri açıqlanıb

02 iyul 2009 12:50 (UTC +04:00)

Bakı. Elnur Hüseynquluyev – APA-Economics. Bu gün Bakıda «Azərbaycanda ictimai vəsaitlərlə bağlı məlumatın açıqlığının monitorinqi Layihəsi»nin nəticələrinin təqdimatı keçirilib. «APA-Economics»in məlumatına görə, tədbirdə vətəndaş cəmiyyəti nümayəndələri, dövlət orqanları, beynəlxalq təşkilatlar, həmçinin neft şirkətlərinin nümayəndələri iştirak ediblər.

Tədbiri giriş sözü ilə açan layihənin koordinatoru Emil Ömərov layihənin metodologiyası və nəticələri, o cümlədən müxtəlif dövlət orqanları və neft şirkətləri üzrə qanuna əməl edilməsi səviyyəsi üzrə reytinq cədvəlini təqdim edib.

E.Ömərovun sözlərinə görə, monitorinq zamanı 168 yazılı sorğu hazırlanıb və sorğularda 355 adda informasiya tələb edilib. Sorğular Milli Büdcə Qrupu, Mədən Sənayesində Şəffaflığın Artırılması Koalisiyası (MSŞAK), Vətəndaş Cəmiyyəti Nəzarəti Şəbəkəsi, o cümlədən «Ekspert» iqtisadi jurnalı və sadə vətəndaşlar tərəfindən nazirliklərə, məhkəmə orqanlarına, komitələr və neft şirkətlərinə göndərilib. Layihə çərçivəsində tələb olunan informasiyalar xarakterinə görə üç yerə bölünüb ki, bu da prosedura, statistika və sənəd xarakterli olub.

E.Ömərov bildirib ki, nazirliklərə 40 sorğu göndərilib və bunun 19-u (icra faizi 47%) cavablandırılıb. Həmçinin, dövlət qurumlarına göndərilən 45 sorğudan 22-si (48%), şirkətlərə göndərilən 64 sorğudan 33-ü (51%), məhkəmə orqanlarına göndərilən 20 sorğunun 10-u (50%) cavablandırılıb.

Tədbirdə bu sahə üzrə ixtisaslaşmış ekspertlər Ələsgər Məmmədli, Osman Gündüz, Zöhrab İsmayılov və Qubad İbadoğlu, o cümlədən layihəyə ekspert qismində qatılmış Azər Mehdiyev, Sahib Məmmədov, Qubad Bayramov öz şərhləri və təmsil etdikləri qurumların fəaliyyəti haqqında məlumat veriblər.

Sonda E.Ömərov növbəti mərhələdə layihənin fəaliyyətinin daha da genişləndirərək regional səviyyəyə çatdırılması, Gürcüstan, Ukrayna və Qırğızıstanla birgə monitorinq layihəsinin aparılmasının planlaşdırıldığını vurğulayıb.

Qeyd edək ki, layihə 2007-ci ildən Açıq Cəmiyyət İnstitutu-Yardım Fondunun maliyyə və təşkilatı dəstəyi ilə həyata keçirilir.