Sosial

Ana səhifə

Sosial

Ağsuda qazıntılar zamanı qədim dövrə aid maddi-mədəniyyət nümunələri aşkarlanıb

03 iyul 2009 12:03 (UTC +04:00)

Ağsu- APA- Şahnəzər Bəşirov. Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun Şamaxı-Xınıslı Arxeoloji Ekspedisiyası Ağsu rayonundakı Nərgizava abidəsinin ərazisindən qədim yaşayış dövrünə aid yeni maddi-mədəniyyət nümunələri aşkar edib. APA-nın yerli bürosunun xəbərinə görə, abidənin ərazisinə daxil olan indiki Gəgəli kəndində aparılan kəşfiyyat xarakterli arxeoloji qazıntılar iyulun 3-də başa çatıb. Qazıntılarda Azərbaycan Tarixi Muzeyinin elmi əməkdaşları da yaxından iştirak edib. Arxeoloji qazıntılar zamanı torpaq qəbirlərlə yanaşı, küp qəbirlərə də təsadüf edilib. Azərbaycan Tarixi Muzeyinin arxeologiya elmi fond şöbəsinin müdiri, tarix elmləri namizədi Fariz Xəlilli APA-ya bildirib ki, aşkarlanan 30 ədəd torpaq qəbir, nizə ucluqları, bıçaqlar, sikkələr, bəzək əşyaları dəmir sancaqlar və qırmızı rənglə boyanmış saxsı qablar bizim eradan əvvəl III-I əsrlərə aid maddi-mədəniyyət nümunələridir. Onun sözlərinə görə, skeletlər əsasən üzü cənub-şərqə, sağ böyrü üstə aşkar olunub. Demək olar ki, bütün skeletlərin yanında miniatür qablara rast gəlinir. Üst təbəqədəki qəbirlər təsərrüfat işləri görülərkən dağılıb, materialları qarışıb. Kənd təsərrüfatı işləri zamanı ağır texnikanın təzyiqi alt təbəqələrdəki maddi-mədəniyyət nümunələrinə də təsir edib.
F. Xəlilli deyib ki, Nərgizava abidəsi 1998-ci ildən elmə məlum olub. Ərazidən tapılan 100-ə yaxın tunc, qızıl, saxsı və daş məmulatdan ibarət eksponatlar Azərbaycan Tarixi Muzeyində və Ağsu rayon Tarix-Diyarşunaslıq Muzeyində mühafizə edilir.