Sosial

Ana səhifə

Sosial

Azərbaycanda əmək pensiyası alan şəxslərin sayı 1,293 mln. nəfərə çatıb

11 avqust 2009 10:41 (UTC +04:00)

Bakı. Vahab Rzayev – APA-Economics. Azərbaycanda əmək pensiyası alan şəxslərin sayı 1,3 mln. nəfərə yaxınlaşır. Dövlət Sosial Müdafiə Fondunun ictimaiyyətlə əlaqələr sektorun müdiri Elman Babayevin «APA-Economics»ə verdiyi məlumata görə, 2009-cu ilin iyul ayının 1-nə əmək pensiyası alan şəxslərin sayı cari ilin əvvəli ilə müqayisədə 17 464 nəfər artaraq 1 292 602 nəfərə çatıb. Onlardan 512 167 nəfəri kişi, 780 435 nəfəri qadındır. Əmək pensiyaçılarının 129 513-ü işləyən pensiyaçılardır.

Əlilliyə görə əmək pensiyası alan şəxslərin sayı isə 308 670 nəfər təşkil edir. Onlardan 22 276 nəfəri I qrup, o cümlədən 7 580 nəfəri I qrup gözdən əlillərdir. Əmək zədəsi və peşə xəstəliyi ilə əmək pensiyası alan şəxslərin sayı isə 4 582 nəfərdən ibarətdir. Bundan başqa, 37 031 nəfər güzəştli şərtlərlə əmək pensiyası hüququ olan şəxslərdir. Ailə başçısını itirməyə görə əmək pensiyası alan şəxslərin sayı isə 138 146 nəfər təşkil edir. Onlardan 22-ci Azərbaycan Milli Qəhrəmanlarının ailə üzvləridir.

Qeyd edək ki, əmək pensiyasının üç növü var: əlilliyə görə, yaşa görə, ailə başçısını itirməyə görə əmək pensiyası. Əlilliyə görə əmək pensiyası 19 yaşınadək əlil olmuş və ya sağlamlıq imkanları məhdud sığortaolunana bir il sosial sığorta stajı olduqda, 19 yaşından sonra əlil olmuş sığortaolunana isə 1 il sosial sığorta stajı və əlavə olaraq yaşın üstünə gələn hər tam il üçün 4 ay sosial sığorta stajı olduqda təyin edilir.

Bununla yanaşı, 62 yaşına çatmış kişilərin və 57 yaşına çatmış qadınların azı 5 il sosial sığorta stajı olduqda yaşa görə əmək pensiyası hüququ var.

Ailə başçısını itirməyə görə əmək pensiyası isə vəfat gününədək ailə başçısının yuxarıda göstərilən qaydada (əlilliyə görə əmək pensiyası hüququ yaranması şərtlərinə uyğun) sosial sığorta stajı olduqda təyin edilir.