Sosial

Ana səhifə

Sosial

TQDK sədri ali məktəblərin boş qalan plan yerlərinə və orta ixtisas məktəblərinə aparılan müsabiqənin nəticələrinə həsr olunan mətbuat konfransı keçirib

14 avqust 2009 10:17 (UTC +04:00)

Bakı. Nicat Mustafayev – APA. Tələbə Qəbulu üzrə Dövlət Komissiyasının (TQDK) sədri Məleykə Abbaszadə Azərbaycanda ali məktəblərin boş qalan plan yerlərinə və orta təhsil bazasından (11 illik) orta ixtisas məktəblərinə qəbulla bağlı aparılan müsabiqənin nəticələrinə həsr olunan mətbuat konfransı keçirib. APA-nın məlumatına görə, Məleykə Abbaszadə qeyd edib ki, ölkədə 17 il ərzində ilk dəfə olaraq müxtəlif ixtisaslar üzrə demək olar ki, vakant yerlər qalmayıb: «Ali məktəblərin boş qalan 1 554 plan yerinə 1 022 abituriyent qəbul olub. Ümumiyyətlə isə, cari tədris ili üçün ali məktəblə üzrə ayrılan 29 030 plan yerinə 28 498 abiturient qəbul olub. Qəbul planı 98,17 faiz dolub. Qalan yerlərə isə sadəcə, abituriyentlər maraq göstərməyib. Ümumiyyətlə isə, abituriyentlər ixtisaslarını düzgün seçiblər».
M. Abbaszadənin sözlərinə görə, orta təhsil bazasından (11 illik) orta ixtisas məktəblərinə qəbul olmaq üçün 6 614 plan yerinə 6 406 nəfər qəbul olub, onlardan 6 069 nəfəri Azərbaycan, 337 nəfəri isə rus bölməsi üzrə təqdim olunmuş plan yerlərinə qəbul olub: «Regionda olan texnikumlarda da yerlər demək olar ki, yüz faiz dolub».

TQDK-nın sədri həmçinin qeyd edib ki, cari tədris ilində ən yüksək ballar Dövlət İdarəetmə Akademiyası, Azərbaycan Tibb Universiteti, Bakı Dövlət Universiteti, Azərbaycan Neft Akademiyası, Azərbaycan Kənd Təsərrüfatı Universiteti və həmçinin bir neçə özəl ali məktəblərin bir sıra fakültələrinə qəbulda qeydə alınıb: «Ali məktəblərə qəbul olan abituriyentlərin 55,4 faizi 300-500 bal, 24,3 faizi 200-300 bal, 14,8 faizi 500-700 bal, 2,9 faizi 100-200 bal, 2,6 faizi isə 50-100 bal toplayıb, 996 nəfər isə 600 baldan çox toplayaraq ali məktəblərə qəbul olub”.
M. Abbaszadə onu da deyib ki, bu ilin avqust ayının 30-da Azərbaycanda orta təhsil bazasından (9 illik) orta ixtisas məktəblərinə qəbul imtahanları keçiriləcək.