Sosial

Ana səhifə

Sosial

Bakıda ISESCO-nun dəstəyi ilə «Təhsildə İKT-nin tətbiqi» mövzusunda seminar keçirilib

14 avqust 2009 13:10 (UTC +04:00)

Bakı. Nicat Mustafayev – APA-Economics. Azərbaycan Təhsil Nazirliyi və İslam Ölkələri Elm, Təhsil və Mədəniyyət Təşkilatı (ISESCO) Bakıda «Təhsildə İKT-nin tətbiqi» mövzusunda üçgünlük milli seminar keçirib.

İKT İnformasiya Mərkəzindən «APA-Economics»ə verilən məlumata görə, seminar Təhsil sisteminin informasiyalaşdırılması üzrə Dövlət Proqramı (2008-2012-ci illər) çərçivəsində keçirilib. Seminarda Təhsil Nazirliyi nəzdində Təhsil Sisteminin İnformasiyalaşdırılması İdarəsinin rəisi Samir Məmmədov dövlət proqramı çərçivəsində görülən işlər haqqında danışıb və proqram çərçivəsində qurulan Məlumat və Resurs Mərkəzi, Azərbaycan Təhsil Şəbəkəsi, Təhsil Portalı və s. fəaliyyətlər üzrə seminar iştirakçılarını məlumatlandırıb.

Təhsil Nazirliyinin beynəlxalq əlaqələr şöbəsinin müdiri Əziz Axundov Azərbaycanın təhsil sisteminin müasir standartlara uyğün qurulması istiqamətində fəaliyyət çərçivəsində Nazirliyin beynəlxalq təşkilatlarla əməkdaşlıq etdiyini vurğulayıb. Onun sözlərinə görə, bu əməkdaşlıq Azərbaycanın təhsil sisteminin daimi inkişafı ilə yanaşı, milli təhsil nailiyyətlərinin dünya ictimaiyyətinə çatdırmağa imkan yaradır. A.Axundov ISESCO-nun Təhsil Nazirliyi ilə sıx əməkdaşlıq etdiyini də bildirib.

Öz növbəsində ISESCO-nun nümayəndəsi Əli İbrahimi müasir təhsil sistemində İKT-nin mühüm alətlərdən biri olmasını qeyd edib və bildirib ki, inkişafın vacib komponentı olan təhsil yeni texnologiyalar vasitəsilə öz mühüm vəzifəsini daha effektiv həll edə bilir. Ə.İbrahimi çıxışında bu istiqamətdə ISESCO təşkilatının həyata keçirdiyi layihələr haqqında geniş məlumat verib və Azərbaycanla da bu istiqamətdə əməkdaşlığın vacibliyini bildirib.

Seminarda «Təhsilin idarə olunmasında İKT-nin tətbiqi problemləri: dünya təcrübəsindən istifadə» və s. mövzularda təqdimatlar keçirilib. Tədbir çərçivəsində təhsildə İKT-nin tətbiqi üzrə işçi qruplarda praktik işlər də həyata keçirilib.