Sosial

Ana səhifə

Sosial

Sentyabrın 10-12-də Bakıda III Azərbaycan Beynəlxalq Təhsil və Karyera Sərgisi keçiriləcək

20 avqust 2009 12:00 (UTC +04:00)

Bakı. Nicat Mustafayev – APA-Economics. Bu ilin sentyabr ayının 10-12-də Azərbaycan Təhsil Nazirliyinin dəstəyi və Böyük Britaniyanın «ITE Group» şirkətinin Qafqazdakı eksklyuziv tərəfdaşı olan «Iteca Caspian» şirkətinin təşkilatçılığı ilə Bakıda III Azərbaycan Beynəlxalq Təhsil və Karyera Sərgisi («Education and Career») keçiriləcək.

«Iteca Caspian» şirkətindən «APA-Economics»ə verilən məlumata görə, sərgidə İsveçrə, Almaniya, Türkiyə, İtaliya, Rusiya, Belarus, Ukrayna, Çexiya, Macarıstan və digər ölkələrin təhsil müəssisələri iştirak edəcək. Bundan başqa, Böyük Britaniya təşkilatları xarici ölkələrdə ali təhsil müəssisələrini bitirən gənclərin işlə təmin olunması üzrə proqramları, ABŞ isə Ali Biznes Məktəbini təqdim edəcək. İlk dəfə olaraq, İsveçrə universiteti tərəfindən mehmanxana işinin idarə olunması üzrə ali məktəb təqdim olunacaq.

Builki sərgidə öz debüt çıxışı ilə Azərbaycan Gənclər və İdman Nazirliyi də iştirak edəcək. Sözügedən qurum «Gənclər Təhsil Mərkəzi», «AIESEC Azərbaycan», «Gələcəyə körpü», «Vətandaş Cəmiyyətində Debat Birliyi» kimi müxtəlif qeyri-hökumət gənclər təşkilatlarını və cəmiyyətlərini təqdim edəcək.

Bununla yanaşı, ilk dəfə olaraq sərgidə konsaltinq, təlim, seminar və digər xidmətlər təklif edən şirkətlər də iştirak edəcək.

Üç gün ərzində sərgi ərazisində müxtəlif tədris proqramları, treninqlər və kursların «online» rejimdə təqdimat mərasimləri keçiriləcək. Sərgidə mədəni mübadilə proqramları, Azərbaycana və xarici ölkələrə səfər etmək, təhsil almaq və işləmək imkanları barədə ətraflı məlumat veriləcək.