Sosial

Ana səhifə

Sosial

«BP-Azerbaijan» şirkəti Bakı-Ceyhan neft kəmərinin keçdiyi ərazidə idman meydançası inşa edib

26 avqust 2009 08:06 (UTC +04:00)

Bakı. Nicat Mustafayev – APA-Economics. «BP-Azerbaijan» şirkəti Azərbaycanda həyata keçirdiyi «BP və Tərəfdaşlarının İcmaların İnkişafı Təşəbbüsləri» layihəsi çərçivəsində Bakı-Tiflis-Ceyhan (BTC) neft boru kəmərinin keçdiyi Goranboy rayonunun Eyvazlılar kəndində inşa etdiyi məktəbdə idman meydançasını istifadəyə verib.

«APA-Economics»in məlumatına görə, burada həyata keçirilən işlər layihənin III mərhələsi çərçivəsində həyata keçirilir. Belə ki, III mərhələ «Davamlı Ətraf Mühiti və İqtisadi Fəaliyyət Layihəsi»ndən ibarətdir və layihə BTC kəmərinin keçdiyi Goranboy rayonunun Eyvazlılar, Məşədi Qaralar və Cinli Boluslu kəndlərində həyata keçirilir.

Eyvazlılarda istifadəyə verilmiş idman meydançasında bir sıra idman avadanlıqları, futbol, voleybol, basketbol meydançaları, stolüstü tennis və digər idman növləri ilə məşğul olmaq üçün şərait yaradılıb. Meydançanın tikintisinin ümumi dəyəri 16,5 min manatdan artıq təşkil edib ki, bunun da 10,7 min manatını «BP-Azerbaijan» və onun tərəfdaşları, 2,5 min manatını Eyvazlılar icması, 2,4 min manatını Goranboy İcra Hakimiyyəti, 1 min manatını isə «Yəhya» Kəndli Fermer Təsərrüfatı ayırıb.

Qeyd edək ki, bu kəndlərdə «BP-Azerbaijan» və onun tərəfdaşları tərəfindən həmçinin meyvəçilik və tərəvəzçiliyin yaxşılaşdırılması, yem emalı qurğusunun inşası, İnsan İnkişaf İttifaqının institusional inkişafı, damcılı su qurğusunun quraşdırılması da maliyyələşdirilib. Üçüncü mərhələyə 174 min ABŞ dolları məbləğində vəsait ayrılıb. Bu mərhələ bir il davam edəcək ki, gələcəkdə digər mərhələlərin icrası da həyata keçirilə bilər.

Xatırladaq ki, bundan öncə «BP-Azerbaijan» şirkəti «BP və Tərəfdaşlarının İcmaların İnkişafı Təşəbbüsləri» layihəsinin I və II fazalarını həyata keçirib. Bu fazalarda Bakı-Tiflis-Ceyhan neft boru kəmərinin keçdiyi 13 rayon və şəhərlərdə yolların bərpası və tikintisi, məktəb binasının inşası, kənd evlərində hamamlarda suyun isitməsi üçün günəş kollektorlarının quraşdırılması, suvarma kanallarının bərpası, tibb məntəqələrinin inşası və bir sıra digər işlər görülüb ki, bütün işlərə 2 mln. manatdan artıq vəsait xərclənib.