Sosial

Ana səhifə

Sosial

Koreyada 21 yerli tələbə Azərbaycan dili üzrə mütəxəssis olmaq üçün təhsil alır

27 avqust 2009 06:42 (UTC +04:00)

Bakı-APA. Koreyada təhsil alan azərbaycanlı gənclərin sayı artmaqdadır. Azərbaycanın Koreyadakı səfirliyindən APA-ya daxil olan məlumata görə, hazırda Koreyanın Seul, Busan, Daecon, Daequ, İksan, Çoncu və Quanqcu şəhərlərində yerləşən universitetlərdə Azərbaycanın müxtəlif universitet, dövlət və özəl qurumlarını təmsil edən 50-yə yaxın tələbə, o cümlədən Azərbaycan prezidenti İlham Əliyevin fəxri doktoru olduğu Kyunghee Universitetində 14 azərbaycanlı tələbə təhsil alır.

Xatırladaq ki, 2007-ci ildə Koreyada təhsil alan azərbaycanlı tələbələrin sayı cəmi 7 nəfər olub.

Hazırda Koreyada Azərbaycan dilinin tədris olunmasına da nail olunub. Belə ki, 2008-ci ilin mart ayından etibarən Koreya Xarici Dillər Universitetində (KXDU) fəaliyyət göstərən Türk dili fakültəsi çərçivəsində Azərbaycan dilinin tədrisi həftədə bir dəfə (iki saat) həyata keçirilməyə başlayıb. Ötən təhsil ili ərzində 25 koreyalı tələbə Azərbaycan dili dərslərində iştirak edib.

2008-ci ilin sonunda KXDU-da rəsmi olaraq Türk-Azərbaycan dilləri fakültəsinin yaradılması haqqında qərar qəbul edilib. 2009-cu ilin yaz semestrindən etibarən Azərbaycan dili kurslarının tədrisinə başlanılıb.

Türk-Azərbaycan dilləri fakültəsinin yaradılması münasibətilə səfirlik tərəfindən KXDU-ya Azərbaycan dili, ədəbiyyatı, mədəniyyəti və tarixinə dair dərsliklər hədiyyə edilmişdir. Bundan əlavə, səfirliyin təşkilatçılığı ilə Türk-Azərbaycan dilləri fakültəsinin professoru cənab Oh Çonq Cinin Azərbaycanın müvafiq ali təhsil müəssisələrində Azərbaycan dili ilə daha da yaxından tanış olması və müvafiq materiallar toplamasının təmin edilməsi məqsədilə 10 günlük müddətə Azərbaycana səfər edib.

Hazırda Türk-Azərbaycan dilləri fakültəsinin professorları cənab Oh Conq Cin və Yeon Qyu Seok tərəfindən səfirliyin fakültəyə təqdim etdiyi dərsliklər və digər materiallar əsasında Azərbaycan dilinin tədrisi həyata keçirilir və 21 koreyalı tələbə Azərbaycan dili üzrə təhsilini davam etdirir.