Sosial

Ana səhifə

Sosial

9 illik (əsas) təhsil bazasından orta ixtisas məktəblərinə keçiriləcək qəbul imtahanında iştirak etmək üçün 26408 abituriyent sənəd verib

28 avqust 2009 10:03 (UTC +04:00)

Onlardan 15958 nəfəri qız, 10450 nəfəri oğlandır. TQDK-nın mətbuat xidmətindən APA-ya verilən məlumata görə, qəbul imtahanı Bakı, Sumqayıt, Naxçıvan, Gəncə, Lənkəran, Mingəçevir, Şəki, Şirvan, Quba və Göyçay şəhərlərində 50 binada keçiriləcək. İmtahan bütün binalarda saat 14.00-da başlayacaq.

Bakıda 11307, Sumqayıtda 2310, Naxçıvanda 824, Gəncədə 3338, Lənkəranda 1525, Mingəçevirdə 1416, Şəkidə 1150, Şirvanda 1572, Qubada 1409, Göyçayda 1557 abituriyent imtahan verəcək. 1697 nəzarətçi müəllimin iştirak edəcəyi imtahana 206 imtahan rəhbəri cəlb olunub. Bu il 9 illik (əsas) təhsil bazasından 672 ixtisas üzrə 478 orta ixtisas məktəbinə qəbul aparılır.

9516 plan yerindən 5652-si ödənişsiz, 3864-ü ödənişli əsaslarla olan ixtisaslardır. Onlardan 8548 yer Azərbaycan bölməsinə, 222 yer rus bölməsinə, 746 yer isə birgə müsabiqə aparılan ixtisaslara aiddir.

Abituriyentlər 1 saat 30 dəqiqə ərzində hər fəndən 15 sual olmaqla Ana dili, Azərbaycan tarixi və riyaziyyatdan imtahan verəcəklər. Rus bölməsinin abituriyentləri ana dili fənn bloku daxilində rus dili fənni ilə yanaşı, Azərbaycan dili fənnindən də imtahan verəcəklər. Həmin abituriyentlərə Azərbaycan dilindən 5, rus dilindən isə 10 sual təqdim olunacaq. İmtahanın nəticələri sentyabrın 5-dək TQDK-nın internet saytında yerləşdiriləcək.

tələbə_qəbul