Sosial

Ana səhifə

Sosial

Azərbaycanda 6 tondan artıq yararsız «Slavyanka №1» suyunu məhv edilib

01 sentyabr 2009 16:33 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyinin Antiinhisar Dövlət Xidməti tərəfindən Azərbaycanda «Slavyanka №1» əmtəə nişanlı suyun məhv edilməsinə dair qərar qəbul olunub.
Nazirlikdən «APA-Economics»ə verilən məlumata görə, bir neçə gün öncə İstehlak Bazarı üzrə Dövlət Nəzarət Xidməti tərəfindən «Slavyanka №1» əmtəə nişanlı suyun istehsal edildiyi sexdə olan su çənindən və açıq havada günəş şüaları altında saxlanılan hazır məhsuldan götürülmüş nümunələrin tərkibində bağırsaq çöplərinin normadan artıq olması aşkar edilib. Bununla əlaqədar həmin suyun satışının qarşısının alınması və ticarət dövriyyəsində bu əmtəə nişanı ilə satılan malların keyfiyyətinin yoxlanılması tədbirləri davam etdirilir.
«Slavyanka №1» əmtəə nişanlı suyun istehsal edildiyi Xətai rayonu, Süleyman Vəzirov küçəsi, 33 ünvanında fiziki şəxs Nadir İbrahimova məxsus sexin su çənindəki təxminən 2 min litr suyun və açıq havada günəş şüaları altında saxlanılan 4 147,5 litr satışa hazır məhsulun tərkibində bağırsaq çöplərinin normadan artıq olması ilə əlaqədar, bu malların məhv edilməsi barədə İqtisadi İnkişaf Nazirliyi yanında Antiinhisar Dövlət Xidməti tərəfindən qərar qəbul edilib. Suyun istehsal edildiyi sexin çənində qablaşdırılma üçün nəzərdə tutulan su, eləcə də satışa hazır məhsul qanunvericiliklə müəyyən olunmuş qaydada məhv edilib.
Eyni zamanda İstehlak Bazarına Nəzarət üzrə Dövlət Xidməti tərəfindən 5 ticarət obyektində 1 863,5 litr həcmində müxtəlif tutumlu qablarda «Slavyanka №1» əmtəə nişanlı sular aşkar edilib, həmin sulardan qanunvericiliyə müvafiq qaydada götürülmüş nümunələr laborator müayinəyə göndərilib. Laborator müayinənin nəticələri bəlli olanadək bu suların satışı dayandırılıb.
Qeyd edək ki, «Slavyanka №1» suyu ilə bağlı araşdırmalar davam etdirilir.