Sosial

Ana səhifə

Sosial

Mərkəzi Klinik Xəstəxanada Azərbaycanda ilk dəfə ürəkdə süni xorda köçürülməsi əməliyyatı həyata keçirilib - FOTO

Mərkəzi Klinik Xəstəxanada Azərbaycanda ilk dəfə ürəkdə süni xorda köçürülməsi əməliyyatı həyata keçirilib - <font color=red>FOTO</font>

11 sentyabr 2009 10:42 (UTC +04:00)

Bakı. Kəmalə Quliyeva – APA. Bakı şəhərindəki Mərkəzi Klinik Xəstəxanada Azərbaycanda ilk dəfə ürəkdə süni xorda köçürülməsi əməliyyatı həyata keçirilib. Bu barədə APA-ya klinikanın baş həkimi, əməliyyatı keçirən ürək-damar cərrahı Kamran Musayev məlumat verib. O bildirib ki, 5 gün əvvəl əməliyyat edilən 53 yaşlı Tamella Abbasova gənc yaşlarında revmokarditdən müalicə olunub və keçirdiyi revmatizm nəticəsində ürəyinin mitral qapağında ciddi pozulmalar əmələ gəlib: “Biz cərrahiyyə əməliyyatına qərar verdik və ürəyinin mitral qapağını bərpa etdik. Əməliyyat çox uğurlu keçdi və bu gün xəstə evə buraxılır. Sevindiricidir ki, ölkədə ilk dəfə süni xorda köçürülməsi kimi ciddi texniki hazırlıq tələb edən əməliyyatın tətbiqinə nail olduq”.

K. Musayev qeyd edib, ürək qapağı xəstəlikləri ürək xəstəlikləri arasında yayılma dərəcəsinə görə ikinci sıradadır: “Ürək qapaqlarının anatomiyasında və fiziologiyasında dönməz proseslər baş verirsə, biz onu cərrahi metodla müalicə edirik. Son illərə qədər ürək qapaqlarına cərrahi müdaxilə ilə bağlı apardığımız əsas əməliyyat qapaqların protezləşdirilməsi əməliyyatı idi. Pozulmuş, quruluşunu və funksiyasını itirmiş ürək qapaqlarını mexaniki və ya bioloji protezlərlə əvəz edirdik. Bu əməliyyatların xəstələrə çox böyük faydası olsa da, xəstələr ömür boyu qan durulducu dərmanlardan istifadə etmək məcburiyyətində qalırdılar. Bu, xəstələrdə həm diskomfort yaradırdı, həm də əməliyyatdan sonra onlarda qanaxma və ya trombların əmələ gəlməsinə səbəb olurdu. Ona görə də son illər dünyada qapaqların bərpası əməliyyatları meydana çıxıb. Bu, o deməkdir ki, ürəyin təbii qapağı qorunub saxlanılır. Mərkəzi Klinikada son bir il yarım, iki ildir ki, qapaqların bərpası əməliyyatları dünya praktikasına uyğun şəkildə aparılır. Bu əməliyyatlar texniki heyət üçün kifayət qədər çətin əməliyyatlar hesab olunur. Dünyada bu əməliyyatlar yalnız inkişaf etmiş ürək cərrahiyyəsi mərkəzlərində icra edilir. Artıq biz nəinki ürək qapaqlarının özünü, hətta həmin qapaqların altında yerləşən xordaları, xalq arasında ürəyin incə telləri deyilən strukturu da təmir edirik. Bunun üçün xüsusi materialdan istifadə olunur. Həmin materiallar ABŞ-dan gətirilmiş və xorda əvəzinə keçici olan materiallardır. Bu əməliyyatın adı “süni xorda köçürülməsi” adlanır. Biz ürək qapağını qoruyaraq onun incə tellərinin, tibbi dildə desək, xordalarının əvəzinə süni xorda köçürərək yenə də ürəyin öz təbii qapağını qorumuş oluruq”.