Sosial

Ana səhifə

Sosial

Azərbaycanın Quba rayonunda Soyqırımı Memorial Kompleksinin tikintisinə bu ilin yazında başlanacaq

06 yanvar 2010 10:59 (UTC +04:00)

Bu barədə APA-nın şimal bürosuna açıqlamasında Quba rayon İcra Hakimiyyətinin başçısı Rauf Həbibov bildirib.

R. Həbibov deyib ki, sökülmə ilə bağlı sakinlərə kompensasiya ödəniləcək, 11 ailənin mənzillə təmin olunması üçün İcra Hakimiyyəti müvafiq tədbirlər həyata keçirəcək. İcra başçısı kompleksin tikintisinə yaz aylarında başlanacağını qeyd edib.

APA-nın şimal bürosu xəbər verir ki, bu gün Fövqəladə Hallar Nazirliyinin (FHN), Mədəniyyət və Turizm Nazirliyinin, “Meliorasiya və Su Təsərrüfatı” ASC-nin və Azərbaycan Milli Elmlər Akademiyasının (AMEA) nümayəndələri kütləvi məzarlığın yerləşdiyi ərazidə olublar. Onlar prezident İlham Əliyevin məzarlıqda Soyqırımı Memorial Kompleksinin tikintisi ilə bağlı imzaladığı sərəncamın icrası ilə əlaqədar əraziyə baxış keçiriblər.

AMEA-nın birinci vitse-prezidenti Arif Həşimov APA-ya bildirib ki, ərazidə yaradılacaq kompleks həm yerli mühitə uyğunlaşdırılmalı, həm də gələcəkdə tədqiqatçıların araşdırma aparmaları üçün müvafiq şəraitdə inşa edilməlidir. A. Həşimov kütləvi məzarlığın ermənilərin azərbaycanlılara qarşı törətdikləri soyqırımın nişanəsi kimi qorunub saxlanması və bütün dünyaya tanıdılması üçün yeni yaradılacaq muzeyin xüsusi əhəmiyyət kəsb etdiyini bildirib.

Əraziyə baxış keçirən FHN-in mütəxəssisləri məzarlığın yaxınlığından keçən Qudyalçayda torpaq sürüşməsinin mövcud olduğunu təyin ediblər. Onlar burada müvafiq müdafiə tədbirləri görülməsi, həmçinin məzarlığın yaxınlığındakı fərdi tikililərin sökülməsinin zəruriliyini qeyd ediblər.

Qeyd edək ki, Azərbaycan prezidenti İlham Əliyev ötən il dekabrın 30-da Quba şəhərində Soyqırımı Memorial Kompleksinin yaradılması haqqında sərəncam imzalayıb.
Kompleksin yaradılması məqsədilə 2009-cu ilin dövlət büdcəsində nəzərdə tutulmuş Azərbaycan Prezidentinin Ehtiyat Fondundan Quba rayon İcra Hakimiyyətinə 1 milyon manat ayrılıb.

Quba_məzarlıq