Sosial

Ana səhifə

Sosial

Səlim Müslümov: “DSMF-nin əmək haqlarını leqallaşdırmaq üçün tədbir görmək səlahiyyəti yoxdur”

19 mart 2010 14:05 (UTC +04:00)

Bakı. Aynur Vəliyeva - APA-Economics. Azərbaycan Dövlət Sosial Müdafiə Fondu (DSMF) hazırda bir pensiyaçının minimal müavinətini təmin etmək üçün 4 sosial sığorta ödəyicisinin haqqından istifadə edir.

«APA-Economics»in məlumatına görə, bunu jurnalistlərə açıqlamasında DSMF sədri S.Müslümov bildirib.

Onun dediyinə görə, bu vəziyyət Azərbaycanda əmək haqlarının 90%-dən çoxunun 75 manat səviyyəsində göstərilməsi nəticəsində yaranıb: “Halbuki real orta aylıq əmək haqqının məbləği bundan qat-qat çoxdur”.

S.Müslümovun sözlərinə görə, bu halları aradan qaldırmağa DSMF-nin səlahiyyəti çatmır: “Çünki müəssisə və təşkilatlarda aparılan yoxlamalar zamanı yalnız əmək haqqı 75 manatdan aşağı olduğu halda sanksiya tətbiq edə bilərik. Bizim “niyə əmək haqqı 75 manatdan yuxarı deyil?” sualını verməyə səlahiyyətimiz çatmır. Biz müəssisə və təşkilatlarda olduğumuz zaman yalnız kadr şöbəsində uçota alınıb müqaviləsi bağlanmış şəxslərin əmək haqqı cədvəlində görünməsi və 75 manatdan aşağı olmayaraq əmək haqqı göstərilməsini yoxlaya bilərik. Bundan artıq hüququmuz yoxdur”.

Fondun sədri qeyd edib ki, gələcəkdə pensiyaların artırılmasında əmək haqlarının leqallaşdırılması mühüm rol oynayır: “İşçilər bu prosesdə fəal iştirak etməlidirlər ki, gələcəkdə onların təbii tələbatlarını təmin edəcək pensiya almaq hüquqları olsun”.

Qeyd edək ki, bütün bu problemlərə baxmayaraq, DSMF artıq mart ayının pensiyalarını tam təmin edib. S.Müslümov bildirib ki, bu gün fondun hesabından 50 mindən artıq hərbi qulluqçu olan pensiyaçıların müavinətini təmin etmək məqsədilə 15 mln. manat məbləğində son təminat köçürülüb: “Sabahdan etibarən pensiyaçılar bankomatlardan öz müavinətlərini ala bilərlər”.