Sosial

Ana səhifə

Sosial

Ombudsmanın təşəbbüsü ilə Novruz bayramı ilə bağlı cəzaçəkmə müəssisələrində tədbirlər təşkil olunub

19 mart 2010 16:03 (UTC +04:00)

Bakı-APA. Azərbaycan Respublikasının İnsan Hüquqları üzrə Müvəkkili Elmira Süleymanovanın təşəbbüsü və təşkilatçılığı ilə Azərbaycan Qızıl Aypara Cəmiyyəti, Ombudsmanın uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsi ilə birlikdə Ədliyyə Nazirliyi Penitensiar Xidmətinin qadınlar üçün 4 saylı cəzaçəkmə və uşaq tərbiyə müəssisələrində Novruz bayramı münasibətilə tədbirlər təşkil olub. Ombudsman Aparatının mətbuat xidmətindən APA-ya verilən məlumata görə, tədbirlərdə Penitensiar Xidmətin nümayəndələri iştirak ediblər.
Aparatın Hüquqi maarifləndirmə sektorunun əməkdaşı Rəşid Rumzadə, Məhbusların hüquqlarının müdafiəsi sektorunun Lalə Əzimova çıxış edərək, Ombudsmanın Novruz bayramı münasibətilə təbriklərini və tövsiyələrini məhkumlara çatdırıblar. Bayram günlərində humanizm prinsiplərinə əsaslanaraq ölkə prezidentinin imzaladığı sayca 47-ci olan Əfv Fərmanı ilə 72 məhkumun əfv olunduğu bildirilib. Müvəkkilin müraciətləri nəzərə alınaraq, sonuncu əfv fərmanı ilə ümumən 10 məhkumun əfv olunduğu, Ombudsmanın vəsatətləri üzrə bu günədək ümumilikdə 319 məhkumun, o cümlədən yetkinlik yaşına çatmayan, qadın, xəstə, ahıl məhkumların, həmçinin jurnalistlərin əfv edilərək azadlığa buraxıldığı vurğulanıb.
Ombudsmanın bayram sovqatları qadınlar üçün 4 saylı cəzaçəkmə və uşaq tərbiyə müəssisələrində islah olunan məhkumlara paylanıb.