Sosial

Ana səhifə

Sosial

Hidrometeoroloqlar Azərbaycan ərazisində gözlənilən hava şəraiti ilə əlaqədar xəbərdarlıq ediblər

12 aprel 2010 09:04 (UTC +04:00)

Cənub-şərq küləyi axşam şimal-qərb küləyi ilə əvəz olunacaq. Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin APA-ya verdiyi məlumata görə, havanın temperaturu gündüz 12-14 dərəcə, axşam 8-10 dərəcə isti olacaq.

Aprelin 13-də hava buludlu olacaq, arabir açılacaq. Səhər bəzi yerlərdə havanın zəif dumanlı, çiskinli olacağı, axşama doğru isə yağış yağacağı ehtimalı var. Şimal-qərb küləyi əsəcək, yarımadanın bəzi yerlərində güclənəcək. Havanın temperaturu gecə 6-8 dərəcə, gündüz 12-14 dərəcə isti olacaq.

Aprelin 14-də buludlu hava şəraiti üstünlük təşkil edəcək. Gecə və axşam bəzi yerlərdə yağış yağacağı ehtimalı var. Şimal-qərb küləyi gündüz şimal-şərq küləyi ilə əvəz olunacaq. Havanın temperaturu gecə 6-8 dərəcə, gündüz 10-12 dərəcə isti olacaq.

Aprelin 15-də hava dəyişkən buludlu, əsasən yağmursuz olacaq. Cənub küləyi əsəcək.
Havanın temperaturu gecə 5-8 dərəcə, gündüz 10-13 dərəcə isti olacaq.

Azərbaycanın rayonlarında aprelin 13-də arabir yağış yağacağı, gecə və axşam bəzi yerlərdə leysan xarakterli olacağı gözlənilir. Qərb küləyi əsəcək, gündüz ayrı-ayrı yerlərdə arabir güclənəcək. Havanın temperaturu gecə 7-9 dərəcə, gündüz 15-18 dərəcə isti, dağlarda gecə 0-3 dərəcə, gündüz 6-11 dərəcə isti olacaq.

Aprelin 14-də və 15-də də yağış yağacağı gözlənilir. Bəzi yerlərdə leysan xarakterli olacağı ehtimalı var. Aprelin 15-də hava gündüz, əsasən yağmursuz keçəcək. Şərq küləyi əsəcək. Havanın temperaturu gecə 7-9 dərəcə, gündüz 11-16 dərəcə isti, dağlarda gecə 1 dərəcə şaxtadan 3 dərəcəyədək isti, gündüz 7-10 dərəcə isti olacaq.

Tibbi-meteoroloji proqnoza əsasən, aprelin 13-də və 14-də Abşeron yarımadasında qeyri-sabit və rütubətli hava şəraiti meteohəssas insanlarda narahatlıq hissi yaratsa da, aprelin 15-də əksər meteoroloji amillərin zəif və mülayim tərəddüdləri meteohəssas insanlar üçün nisbətən əlverişlidir.

Hidrometeoroloji Proqnozlar Bürosu gözlənilən hava şəraiti ilə əlaqədar xəbərdarlıq da edib. Xəbərdarlıqda bildirilir ki, aprelin 12-də axşamdan aprelin 15-dək ölkə ərazisində hava şəraitinin qeyri-sabit keçəcəyi, şimşək çaxacağı, arabir yağış yağacağı gözlənilir. Gecə və axşam saatlarında bəzi yerlərdə leysan xarakterli olacağı, yağışın yüksək dağlıq ərazilərdə sulu qara keçəcəyi ehtimalı var. Şimal-qərb küləyi aprelin 13-də arabir güclənəcək. Temperatur tədricən 3-6 dərəcə aşağı enəcək. Çaylarda sululuğun artacağı, bəzi dağ çaylarından qısamüddətli daşqın və sel keçəcəyi ehtimal olunur.

hava