Sosial

Ana səhifə

Sosial

Tovuzda Heydər Əliyevin anadan olmasının 87-ci ildönümü münasibətilə istedadlı şagirdlər arasında keçirilən “Bilik Marafonu” başa çatıb

06 may 2010 07:45 (UTC +04:00)

Bakı-APA. Millət vəkili Qənirə Paşayevanın təşəbbüsü və rayon təhsil şöbəsinin təşkilatçılığı ilə Tovuz rayonunda Heydər Əliyevin anadan olmasının 87-ci ildönümünə həsr olunmuş riyaziyyat, fizika, kimya və biologiya fənləri üzrə istedadlı şagirdlər arasında keçirilən “Bilik Marafonu” başa çatıb. APA-nın xəbərinə görə, rayonun müxtəlif məktəblərini təmsil edən 104 istedadlı gənc arasında keçirilən «Bilik Marafonu» yerli “SM” TV kanalı ilə canlı yayımlanıb. Marafonda çıxış edən Q. Paşayeva Heydər Əliyevin həyatı və onun Azərbaycan dövləti üçün böyük xidmətlərindən danışıb. Deputat marafonun televiziya vasitəsilə canlı yayımlanması təşəbbüsündən də danışıb. O, deyib ki, bu təkcə iştirakçılara deyil, bütün rayon məktəblilərinə, Tovuzla yanaşı SMTV televiziyasının yayımlandığı 20-ə yaxın rayonun məktəblilərinə də öz biliklərini yoxlamaq və sınamaq imkanı verir, marafonun nə dərəcədə obyektiv keçirildiyini hər kəsin görməsinə imkan yaradır. Rayon təhsil şöbəsinin müdiri Şamil Alıyev isə deyib ki, artıq ənənə halını alan «Bilik Marafonu» rayonun təhsilinin inkişafına hər il öz müsbət təsirini göstərməklə yanaşı şagirdlər arasında elmə, biliyə meylin artmasına təkan verir.
O, deyib ki, hər il Tovuz rayonundan ali məktəblərə, hərbi məktəblərə daxil olan şagirdlərin sayının artmasında təşkil olunan marafonların, olimpiadaların, yarışların müsbət təsiri böyükdür.

Dəqiq elmlər sahəsində keçirilən və 2 gün davam edən «Bilik Marafonu» zamanı hər fənn üzrə rayonun ən yaxşı müəllimlərindən ibarət münsiflər heyəti qarşısında canlı efirdə cavab verən şagirdlər arasında ən yaxşılarını 1, 2 və 3-cü yerin qaliblərinə millət vəkili tərəfindən kompüterlər və qiymətli hədiyyələr təqdim olunur.
Hər fənn üzrə 10-dan artıq həvəsləndirici yerin sahiblərinə, ümumilikdə 60-a yaxın şagirdə də müxtəlif hədiyyələr təqdim edilib. Rayonun istedadlı şagirdləri arasında “Bilik Marafonu” 5 ildir keçirilir.