Sosial

Ana səhifə

Sosial

Lənkəranlı müharibə veteranı Moskvaya yola düşüb

06 may 2010 17:47 (UTC +04:00)

Lənkəran. Ağəddin Babayev – APA. Lənkəran rayon sakini, müharibə və əmək veteranı, 1924-cü il təvəllüdlü Ağadadaş Səmədov Böyük Vətən Müharibəsində Qələbənin 65 illiyinə həsr olunmuş hərbi paradda iştirak etmək üçün mayın 6-da Moskvaya yola düşüb. APA-nın cənub bürosunun məlumatına görə, Rusiya prezidenti Dmitri Medvedevin dəvəti ilə hərbi paradda A.Səmədovla birlikdə ölkəmizdən Azərbaycan Veteranlar Şurasının sədri Əliəsəd Baxışov, İsmayıl Qasımov və Nikolay Dolqoruk da iştirak edəcəklər.

Lənkəranın Vilvan kəndində doğulan Ağadadaş Səmədov 1942-ci ildə Kənd Təsərrüfatı Texnikumunu bitirərək 18 yaşında cəbhəyə çağırılıb. Hərbi xidmətə Dərbənddə yaradılan 77-ci Azərbaycan milli diviziyasındakı 105-ci alayın 3-cü batalyonunda başlayıb. 1942-ci ilin dekabrında Mozdoka gələn diviziyanın döyüşçüləri Txaresk şəhərində hərbi and içərək Krasnodar ətrafında şiddətli döyüşlərdə iştirak ediblər. Ağadadaş 1943-cü ilin martında yaralanaraq hərbi hospitalda müalicə olunub.

Yenidən döyüşən orduya qayıdan gənc əsgər bu dəfə 293-cü atıcı diviziyanın tərkibində Şimali Qafqazın azad olunmasında fəallıq göstərib və “İgidliyə görə" medalı ilə təltif olunub. Ukrayna uğrunda döyüşlərdə pulemyotçu Ağadadaş əsl hünər nümayiş etdirib. O, tək-tənha düşmənlə üz-üzə dayanaraq. 3 saat onlarla vuruşub. Pulemyotun gülləsi tükənəndə, ümid 2 qranata qalıb. Kəşfiyyata gələn əsgərlərdən biri bu barədə hissəni xəbərdar edəndən sonra döyüşçülərin inadlı müqaviməti ilə düşmən geri oturdulub. Döyüş hünərinə görə A.Səmədov Şöhrət ordeni ilə təltif edilib.

Ağadadaş Səmədov Polşa uğrunda döyüşlərdə də fərqlənib. Buradakı döyüş hünərinə görə yenidən Şöhrət ordeninə layiq görülüb. Almaniya uğrunda döyüşlərin birində isə Ağadadaş ölümcül yaralanmış komandiri əvəz edərək qələbəni təmin edib.

Şimali Qafqazdan Berlinədək döyüş yolu keçən Ağadadaş Səmədov 1946-cı ilin yanvarında ordudan tərxis olunaraq doğma Vilvan kəndinə qayıdıb. Lakin qəhrəman döyüşçü kimi öz haqqına yalnız 2008-ci ildə çatıb. Onun sənədləri uzun müddət gizlədilib və hətta öldüyü barədə Moskvaya məlumat da çatdırılıb. Sonralar Moskva Mərkəzi Hərbi Arxivinə göndərilən məktublar öz müsbət nəticəsini verib. 2008-ci il iyulun 3-də Bakıya gələn Rusiya prezidenti Dmitri Medvedev Ağadadaş Səmədovla şəxsən görüşərək cəbhədə layiq görüldüyü, lakin indiyə qədər almadığı II və III dərəcəli Şöhrət ordenlərini keçmiş cəbhəçinin yaxasına sancıb.

Qeyd edək ki, 13 oğul-qızı və 100-ə yaxın nəvə-nəticəsi olan A.Səmədov Azərbaycan Respublikasının prezidenti İlham Əliyevin göstərişi ilə Bakıda Göz Xəstəlikləri İnstitutunda müalicə olunub, ona “OKA” markalı minik avtomobili hədiyyə edilib.