Sosial

Ana səhifə

Sosial

Lənkəranda Qarabağ əlilləri və şəhid ailələri üçün tikilmiş yeni yaşayış binası istifadəyə verilib

07 may 2010 12:07 (UTC +04:00)

Lənkəran. Ağəddin Babayev - APA. Mayın 7-də Lənkəran şəhərində Qarabağ müharibəsi əlilləri və şəhid ailələri üçün inşa edilmiş dördmərtəbəli, 36 mənzilli yeni yaşayış binası istifadəyə verilib.

APA-nın cənub bürosunun məlumatına görə, bu münasibətlə keçirilən mərasimi giriş sözü ilə Lənkəran Şəhər İcra Hakimiyyətinin başçısı Tofiq İbrahimov açaraq, şəhid ailələri və Qarabağ müharibəsi əlillərinin sosial rifah halının yüksəldilməsi və onların mənzil-məişət şəraitinin yaxşılaşdırılması məqsədilə həyata keçirilən layihələrin əhəmiyyətindən danışıb.

Əmək və əhalinin sosial müdafiəsi naziri Füzuli Ələkbərov isə çıxışında əhalinin imtiyazlı təbəqələrinə göstərilən dövlət qayğısından, ölkə başçısı İlham Əliyevin 22 aprel 2010-cu il tarixdə imzaladığı “1941-1945-ci illər müharibəsi iştirakçılarına, həlak olmuş və sonradan vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım edilməsi haqqında” Sərəncamı bu diqqətin bariz nümunəsi kimi qiymətləndirib. Nazir şəhid analarını, Qarabağ müharibəsi əlillərini alman faşizmi üzərində tarixi Qələbənin 65 illik yubileyi və Heydər Əliyevin anadan olmasının 87-ci ildönümü ərəfəsində yeni mənzillərə köçmələri münasibətilə təbrik edərək, ölkəmizdə bu qəbildən olan insanların həyat şəraitinin yaxşılaşdırılması, təqaüdlərinin artırılması məqsədilə həyata keçirilən tədbirlərin bundan sonra davamlı olacağını bildirib.

Tədbirdə yeni mənzillərin sahiblərinə orderlərin verilməsi ilə yanaşı, həmçinin I qrup Böyük Vətən Müharibəsi əlilləri, Lənkəran şəhər sakini Cahangir Məmmədova və rayonun Kənarmeşə kənd sakini Mirzə Əkbərova Ukrayna Respublikasının istehsalı olan “Slavuta” markalı minik avtomobilləri hədiyyə olunub.