Sosial

Ana səhifə

Sosial

Səhiyyə Nazirliyi: “Təbii fəlakət bölgəsində stasionar şəraitdə 50-dən çox uşaq doğulub”

04 iyun 2010 14:05 (UTC +04:00)

Bakı. İlhamə İsabalayeva - APA. Azərbaycan Səhiyyə Nazirliyi (SN) fəlakət bölgəsində yaranmış vəziyyətlə bağlı növbəti məlumatını yayıb. Nazirliyin mətbuat xidmətindən APA-ya verilən məlumata görə, əhalinin müvəqqəti məskunlaşma yerlərində ilk gündən tibb məntəqələri yaradılıb, ixtisaslı tibb işçiləri ilə kompleksləşdirilib və lazımi dərman vasitələri ilə təmin olunub. Hazırda respublikanın 9 rayonunda 16 tibb məntəqəsi və 20-dən çox səyyar tibb briqadaları fəaliyyət göstərir. Bu günə kimi həmin məntəqələrə müvafiq somatik xəstəliklərlə əlaqədar 50 mindən çox müraciət olub, onlara lazımı tibbi yardım göstərilib. Bu müddət ərzində yoluxucu xəstəliklərlə əlaqədar müraciətlər olmayıb, infeksion xəstəliklər qeydə alınmayıb.

Əhalinin kütləvi məskunlaşdığı yerlərdə su və qida ilə təminat məsələləri daima diqqət mərkəzindədir.

Məlumatda qeyd edilir ki, əksepidemik rejimə ciddi əməl olunur. Ərazilərdə dezinfeksiya, dezinseksiya və deratizasiya tədbirləri aparılıb. Su basmış ərazilər qurudulduqdan sonra bu tədbirlərin geniş miqyasda aparılması nəzərdə tutulub.

Əhali arasında ən çox psixoemosional gərginliyin olmasını nəzərə alaraq, SN tərəfindən göndərilmiş mütəxəssislər yerlərdə əhali arasında psixoprofilaktik tədbirlər və psixoloji yardımın göstərilməsi istiqamətində müvafiq tədbirləri həyata keçirir.

Təbii fəlakət baş verəndən bu günə kimi stasionar şəraitdə 50-dən çox uşaq doğulub. Dünyaya gəlmiş uşaqların, eləcə də anaların sağlamlığı daima həkim nəzarətindədir. Zahı qadınların bəziləri dərman, geyim, birdəfəlik bezlər, yeni doğulmuşlar üçün geyim və yataq dəstləri, xüsusi uşaq yeməkləri, həmçinin uşaq arabaları ilə təmin olunaraq evə buraxılıb.

Sel basmış ərazilərdən Şirvan şəhərində 1600 nəfər müvəqqəti yaşayış yerlərində məskunlaşdırılıb. Onların 1221 nəfəri çadır şəhərciyində, 229-u texnikum binasında, 130-u peşə liseyi binasında yaşayır. Bunlardan 626 nəfəri uşaqdır. Şirvan Mərkəzi Rayon Xəstəxanasında 24 doğuş olub. Hazırda 44 nəfər xəstə stasionar müalicədədir, kəskin appendesit diaqnozu ilə 3 nəfər cərrahi əməliyyat olunub.

Hazırda dərman təchizatı yaxşıdır, əksepidemik rejimə ciddi nəzarət olunur, su və qidadan nümunələr götürülərək, müvafiq qaydada Bakı şəhərinə müayinəyə göndərilir.

Sabirabad rayonunun sel basmış kəndlərindən 1769 nəfər müvəqqəti yaşayış yerlərində Moranlı çadır şəhərciyində - 129 nəfər, digərləri rayon mərkəzindəki 5 orta məktəbdə) məskunlaşdırılıb. Hər bir məskunlaşma yerlərində tibb məntəqələri yaradılıb.

fəlakət bölgəsi