Sosial

Ana səhifə

Sosial

Bakıda “Qaçqınların və sığınacaq axtaranların müdafiəsi” mövzusunda seminar keçirilir

10 iyun 2010 10:13 (UTC +04:00)

Bakı. Laçın Sultanova-APA. Bu gün Bakıda Birləşmiş Millətlər Təşkilatının Qaçqınlar üzrə Ali Komissarlığı (BMTQAK) və Avropa Şurasının (AŞ) təşkilatçılığı ilə “Qaçqınların və sığınacaq axtaranların müdafiəsi” mövzusunda ikigünlük seminar işə başlayıb.

APA-nın məlumatına görə, BMTQAK-ın nümayəndəsi Arun Sala Nqarm bildirib ki, seminarın məqsədi qaçqınlarla bağlı məsələlərə baxan dövlət məmurlarının Avropa İnsan Hüquqları Konvensiyasının və onun presedent hüququnun tətbiqi sahəsində bacarıqlarını artırmaq, habelə qaçqınların və sığınacaq axtaranların müdafiəsinə görə dövlətlərin qaçqınların statusuna dair 1951-ci il tarixli BMT Konvensiyası üzrə vəzifələrini bir daha təsdiq etməkdir.

AŞ baş katibinin Azərbaycandakı xüsusi nümayəndəsi Veronika Kotek deyib ki, Azərbaycan qaçqın və köçkün problemi ilə üzləşmiş ölkədir. O qaçqınlarla məcburi köçkünlər arasında fərqin nədən ibarət olması barədə məlumat verib, ölkədə üçüncü ölkədən gəlmiş mişrantlar probleminin mövcud olduğunu da qeyd edib.

Nazirlər Kabinetinin şöbə rəisi Məhəmməd Məhərrəmov hazırda dünyada 16 milyon qaçqın, 24 milyon köçkünün olduğunu, Azərbaycanın miqrasiya prosesi ilə 200 il əvvəl üzləşdiyini deyib. O bildirib ki, Rusiya-İran müharibəsi nəticəsində Azərbaycana ermənilərin köçürülməsinə başlanıb, keçən əsrin ortalarında SSRİ rəhbərliyinin qərarı ilə azərbaycanlıların Ermənistandan köçürüldüyünü, 1988-1990-cu illərdə oradan 250 min azərbaycanlının zorla çıxarıldığını, Dağlıq Qarabağ və ətraf 7 rayondan əhalinin zorla çıxarılması və Özbəkistandan qovulan Məhsəti türklərinin ölkəmizə pənah gətirməsi nəticəsində qaçqın və köçkünlərin sayının 1 milyona yaxın olduğunu deyib. O hesab edir ki, beynəlxalq təşkilatların bu insanlara yardımının dayandırması düzgün qərar deyil: “Bu insanların hansı səbəbdən nə vəziyyətə düşməsi nəzərə alınmalıdır. Axı onlar başqa bir dövlətin təcavüzü nəticəsində ev-eşiklərindən məhrum olublar, Azərbaycan ərazilərinin bərpa olunmasında beynəlxalq təşkilatlardan illərlədir dəstək gözləyir”. Məmur bildirib ki, Azərbaycan təbi fəlakət nəticəsində əziyyət çəkən əhalisinə yardım üçün beynəlxalq təşkilatlara müraciət etməyib, amma təcavüz nəticəsində 20 ildir ki əziyyət çəkən əhalinin beynəlxalq yardım almağa tam hüququ var.

2001-2003-cü illərdə Azərbaycanda üçüncü ölkələrdən gəlmiş miqrantların sayının 11 min olduğunu deyən M. Məhərrəmov bildirib ki, hazırda onların sayı 1500-2600 nəfərdir.

BMT QAK-ın eksperti Kristof Biervirf hesab edir ki, Azərbaycanın inkişafı ölkəni miqrantlar üçün daha cəlbedici edir. O təmsil etdiyi qurumun qaçqın və köçkünlərin hüquqlarının müdafiəsi ilə bağlı gördüyü işlər barədə məlumat verib, statistik rəqəmləri sadalayıb.