Sosial

Ana səhifə

Sosial

Milli Məclisin komitə sədri: “ABŞ Dövlət Departamentinin insan alveri ilə bağlı illik hesabatının Azərbaycana aid hissəsinin hər cümləsinə təkzib verə bilərəm”

18 iyun 2010 12:09 (UTC +04:00)

Bu sözləri APA-ya açıqlamasında Milli Məclisin İnsan hüquqları komitəsinin sədri Rəbiyyət Aslanova ABŞ Dövlət Departamentinin dünyada insan alveri ilə bağlı vəziyyətə dair açıqladığı illik hesabatı şərh edərkən deyib.

R. Aslanovanın sözlərinə görə, sözügedən hesabata əsasən, dövlətlər insan alverinin vəziyyətinə görə üç kateqoriyaya ayrılır. Birinci kateqoriyaya qanunvericilik bazasını möhkəmləndirən, insan alverinin qarşısını alan işlək qanunlara malik, bu sahədə milli fəaliyyət planı olan və mühüm addımlar atan dövlətlər daxil edilir.

Komitə sədri deyib ki, ikinci qrup ölkələrə isə bu sahədə irəliyə doğru inkişafı olmayan dövlətlər daxil edilir: “Yəni qanunvericilik bazası zəif olan, insan alveri qurbanlarının sayının durmadan artdığı, problemin həlli ilə bağlı siyasi iradənin olmadığı ölkələr ikinci kateqoriyaya daxil edilir. Üçüncü qrupa isə bu sahədə vəziyyətin çox acınacaqlı olduğu ölkələr aiddir”.

R. Aslanova Azərbaycanın ikinci kateqoriyaya adi edildiyini bildirib: “Hesabatda yazıblar ki, Azərbaycan həm mənbə, həm tranzit, həm də təyinat ölkəsidir. Bu isə qətiyyən doğru deyil. Burada bir məqam da var ki, iki il ardıcıl olaraq ikinci kateqoriyaya daxil edilən ölkələr sonradan üçüncü kateqoriyaya daxil edilir. Üçüncü kateqoriyaya daxil olunandan sonra isə dövlətə qarşı müəyyən sanksiyalar tətbiq olunur. Bu, humanitar deyil, müəyyən maliyyə qurumları tərəfindən, o cümlədən Beynəlxalq Valyuta Fondu tərəfindən tətbiq edilən sanksiyadır. Onlar 177 dövlət haqqında hesabat hazırlayıblar. Bu ölkələrin əksəriyyəti hesabata etiraz bildirib. Bu hesabatın Azərbaycana aid hissəsinin hər cümləsini təkzib etmək olar. Onların iddiaları absurd və diletant xarakterlidir. Qeyri-peşəkar səviyyədə hazırlanan hesabatda olduqca böyük səhvlər var. Onlar başa düşmürlər ki, Azərbaycandan gedən miqrantın hansı ölkədə hüququ pozulursa, bu, artıq həmin ölkədəki vəziyyətin göstəricidir. Azərbaycanda isə miqrantların hüquqları yüksək səviyyədə qorunur”.

Komitə sədri ABŞ Dövlət Departamenti tərəfindən hazırlanan hesabatların böyük əksəriyyətinin qeyri-obyektiv olduğunu bildirib: “Onlar gah Azərbaycan gənclərinin narkoman olduğunu deyir, gah Azərbaycan kişilərini alçaldıcı qul əməyinin daşıyıcısı, gah da qadınları insan alverinin qurbanı edirlər... Bu, alçaldıcı bir mövqe, Azərbaycana qarşı istifadə olunan diplomatik alətdir. Onların Azərbaycana qarşı başqa təzyiq imkanları yoxdur. Bizim cəmiyyətimizi qanundan uzaq, geridə qalmış cəmiyyət kimi təqdim edirlər. Bu, daha çox siyasi təzyiqdir. Mən hesabatın hər cümləsini təkzib edə bilərəm. Məsələn, hesabatda qeyd olunur ki, Azərbaycanın anklavı olan Naxçıvan fahişəliyə cəlb etmək məqsədilə Türkiyəyə daşınan qadınlar üçün tranzit məntəqə rolu oynayır. Halbuki Naxçıvan anklav deyil, eksklavdır. Onlar adicə bu iki terminin fərqini bilmirlər. Biz Azərbaycanın tranzit ölkə olduğunu qəbul edirik. Lakin Azərbaycandan tranzit ölkə kimi istifadə edib, başqa ölkəyə gedən insanın hüquqlarına toxuna bilmərik”.

ABŞ_DD