Sosial

Ana səhifə

Sosial

Azərbaycan Səhiyyə Nazirliyi “Millenium” və “Meridian” dondurmalarında bağırsaq çöpləri və qızılı stafilokok aşkarlayıb

24 iyun 2010 12:40 (UTC +04:00)

Bakı. İlhamə İsabalayeva - APA. Azərbaycan Səhiyyə Nazirliyi Respublika Gigiyena və Epidemiologiya Mərkəzi dondurma və sərinləşdirici içkilərlə bağlı araşdırma aparır. Mərkəzin qidalanma gigiyenası şöbəsinin müdiri İmran Abdullayev APA-ya bildirib ki, iyunun 1-dən başlayan yoxlamalar 30-a qədər davam edəcək. İndiyədək müxtəlif satış obyektlərindən 38 dondurma nümunəsi götürülüb. Onların arasından yalnız Bakının Binəqədi rayonunun Dərnəgül qəsəbəsində fəaliyyət göstərən “Rast-96” müəssisəsinin istehsal etdiyi “Millenium” və “Meridian” dondurmalarından götürülən nümunədə bağırsaq çöpləri və qızılı stafilokok bakteriyası aşkarlanıb. Həmin dondurmalardan yenidən təkrar nümunələr götürülüb. Dondurmalardan “Pinqvin”, “Bakılı qız”, Belie noci” və s.-dən götürülən nümunələr norma daxilində olub.

Mərkəz alkoqolsuz sərinləşdirici içkilərlə bağlı 31 nümunəni araşdırıb. Onların hamısı norma daxilində olub. Həmin içkilərin arasında “Bonakua”, “Akuamineral”, “Fanta”, “Gülüstan” və s. içkilər var.