Sosial

Ana səhifə

Sosial

Azərbaycan Dövlət Sosial Müdafiə Fondunun gəlirləri son bir ildə 8,7% artıb

14 iyul 2010 14:18 (UTC +04:00)

Bakı. Nicat Mustafayev - APA-Economics. Bu gün Azərbaycan Dövlət Sosial Müdafiə Fondunda (DSMF) Fondun orqanlarının 2010-cu ilin I yarımilliyindəki fəaliyyətinin yekunları və qarşıda duran vəzifələrə həsr olunan geniş kollegiya iclası keçirilib.

DSMF-nin İctimaiyyətlə əlaqələr sektorundan «APA-Economics»ə verilən məlumata görə, tədbirdə çıxış edən Fondun sədri Səlim Müslümov qeyd edib ki, ölkədə davam etdirilən islahatlar nəticəsində Azərbaycanın iqtisadi inkişafı və aztəminatlı əhalinin sosial müdafiəsi sahəsində çoxsaylı tədbirlərin icrası cari ilin 6 ayı ərzində də davam edib: «Hazırda Azərbaycanda orta əməkhaqqı təxminən 400 ABŞ dolları təşkil edir, orta pensiyaların həcmi isə təxminən 130 dollardır».

S.Müslümov onu da bildirib ki, 2010-cu ilin yanvar-iyun ayları ərzində DSMF-nin gəlirləri 824,7 mln. manat təşkil edib. Bu da keçən ilin müvafiq dövrünə nisbətən 65,8 mln. manat və ya 8,7% çoxdur. Göstərilən dövrdə sahibkarlıq fəaliyyəti ilə məşğul olan fiziki şəxslərdən məcburi dövlət sosial sığorta haqları üzrə daxilolmalar keçən ilin müvafiq dövrünə nisbətən 6,7% artıb. Torpaq pay mülkiyyətçilərindən qeyd olunan təyinat üzrə daxilolmalar keçən ilin müvafiq dövrünə nisbətən 90,7% artıb.

S.Müslümovun sözlərinə görə, hesabat dövründə Fondun xərcləri 802,4 mln. manat təşkil edib. Hesabat dövründə pensiya və müavinətlərin maliyyələşdirilməsi üçün bütün xərclərin 96,8% və ya 777,1 mln. manatı yönəldilib.

DSMF rəhbəri onu da qeyd edib ki, cari ilin 6 ayı ərzində Fond tərəfindən əlavə olaraq 92 286 sığortaolunana fərdi şəxsi hesab açılıb. Nəticədə iyulun 1-nə olan statistikaya əsasən, Azərbaycanda fərdi şəxsi hesabı olan sığortaolunanların sayı 1 732 215 nəfərə çatıb.

Fondun sədri həmçinin bildirib ki, pensiyaların plastik kartlarla ödənişinin kənd yerlərində yaşayan pensiyaçıları əhatə etməsi tədbirləri genişləndirilib: “Hazırda şəhərlərdə yaşayan pensiyaçıların 100%-i, kəndlərdə isə 96,7%-i, ümumilikdə ödəniş aparılan pensiyaçıların 98,4%-i pensiyasını plastik kartlarla alır”.

Kollegiya iclasında həmçinin “2009-2015-ci illərdə Azərbaycanda sığorta-pensiya sisteminin inkişafına dair Dövlət Proqramı” ilə icrası 2010-cu il üçün nəzərdə tutulmuş tədbirlərin yerinə yetirilməsi vəziyyəti müzakirə edilib. Müzakirələr zamanı sosial sığorta prinsiplərinin daha da gücləndirilməsi, bu zəmində vətəndaşların pensiya təminatının daha da təkmilləşdirilməsi, o cümlədən pensiya təyinatının avtomatlaşdırılması xüsusi diqqət mərkəzində olub.

Tədbirdə həmçinin Fondun yerli orqanlarının 2010-cu ilin yanvar-iyun aylarında fəaliyyəti ətraflı təhlil edilib. Fəaliyyətlərində nöqsanlara yol verən vəzifəli şəxslər barəsində intizam tənbehi tədbirlərinin görülməsi üçün müvafiq qərarlar qəbul olunub.