Sosial

Ana səhifə

Sosial

Səhiyyə Nazirliyi Quba məzarlığındakı sümüklərin çürüməsinin qarşısını almaq üçün görülən tədbirləri yaxın vaxtlarda yekunlaşdıracaq

30 avqust 2010 10:17 (UTC +04:00)

Bakı. İlhamə İsabalayeva-APA. “Qubada ermənilərin azərbaycanlılara qarşı törətdikləri soyqırımı qurbanlarının kütləvi məzarlığındakı sümüklərin xüsusi reaktivlərlə uzun müddət saxlanılması üçün hazırda Səhiyyə Nazirliyi Məhkəmə Tibbi Ekspertiza və Patoloji Anatomiya Birliyi tərəfindən işlər görülür”. Bu açıqlamanı APA-ya Məhkəmə Tibbi Ekspertiza və Patoloji Anatomiya Birliyinin direktoru Şakir Musayev verib. Onun sözlərinə görə, bu məqsədlə hazırlanan xüsusi preparatlar sayəsində sümükdə aşkar olunan xəsarətlər tamlığını itirməyəcək və dağılmayacaq, təmiz havada uzun müddət qala biləcək. Bu işin yaxın vaxtlarda yekunlaşacağını söyləyən Ş. Musayev artıq məzarlıqdakı 7000-ə yaxın sümüyün mərkəzə təhvil verildiyini deyib.

Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun aparıcı elmi işçisi, Quba soyqırımı ekspediyasının rəhbəri Qəhrəman Ağayev APA-ya bildirib ki, məzarlıqdakı tikinti işləri yekunlaşdıqdan sonra dərmanlanmış həmin sümüklər yerinə düzüləcək: “Ancaq məzarlıqda elə sümüklər var ki, onları götürmək mümkün deyil. Xüsusilə quyuda olanları heç cür götürmək mümkün deyil. Elə quyunun özündə təxminən 200-dən yuxarı insan cəsədi var. Qərara gəldik ki, götürülməsi mümkün olmayan sümüklərin elə yerindəcə dərmanlanması üçün məzarlığın yanında laboratoriya qurulsun”.

Q. Ağayev bildirib ki, hazırda Quba Soyqırımı Memorial Kompleksinin təməl qoyma işləri aparılır. Məzarlığın yaxınlığından keçən Qudyalçayın məcrasını dəyişmək məqsədilə “Azərkörpü” Səhmdar Cəmiyyəti tərəfindən yeni bəndin tikintisi işlərinin təxminən 50 faizi artıq görülüb.

Qeyd edək ki, Azərbaycan prezidenti İlham Əliyev ötən il dekabrın 30-da Quba şəhərində Soyqırımı Memorial Kompleksinin yaradılması haqqında sərəncam imzalayıb.
Kompleksin yaradılması məqsədilə 2009-cu ilin dövlət büdcəsində nəzərdə tutulmuş Azərbaycan Prezidentinin Ehtiyat Fondundan Quba rayon İcra Hakimiyyətinə 1 milyon manat ayrılıb.