Sosial

Ana səhifə

Sosial

Azərbaycanda pensiyaların son artımı üçün əlavə 50 mln. manat tələb olunur - YENİLƏNİB - 1

Azərbaycanda pensiyaların son artımı üçün əlavə 50 mln. manat tələb olunur - <font color=red>YENİLƏNİB - 1</font>

01 sentyabr 2010 12:59 (UTC +04:00)

«APA-ECONOMICS»in məlumatına görə, Dövlət Sosial Müdafiə Fondunun (DSMF) sədri Səlim Müslümov deyib ki, bu ilin iyul ayının 1-ə olan məlumata əsasən, Azərbaycanda pensiyaçıların sayı 1 291 139 nəfərdir. İlin sonunadək pensiyaçıların sayının 1 291 308 nəfərə çatacağı gözlənilir.

DSMF sədri qeyd edib ki, 1 mln. 116 min nəfərin pensiyasının baza hissəsi 10 manat, 15 min nəfər I qrup əlilin pensiyasının baza hissəsi 12 manat artacaq. Bundan əlavə, pensiyasının baza hissəsini 200% həcmində alan 7630 nəfər I qrup gözdən əlilin pensiyasının baza hissəsində artım 20, pensiyasının baza hissəsini 55% həcmində alan III qrup əlillərdə pensiyanın baza hissəsinin artımı daha az - 5 manat 50 qəpikdir.

S.Müslümov bildirib ki, ailə başçısını itirməyə görə iki və daha çox ailə üzvü pensiya alırsa, I ailə üzvünə pensiyanın baza hissəsinin 100%, digər ailə üzvlərinə isə yalnız (yalnız hər iki valideyni itirmiş yetim uşaqlar istisna olmaqla, onlara 100% ödənilir) 50% həcmində ödənildiyi üçün onların pensiyasının baza hissəsində 5 manat artım olacaq. Belə şəxslərin sayı 87 min 675 nəfərdir.

Fond sədrinin sözlərinə görə, bu artımların daha çox şamil olunacağı kateqoriyadan olan vəfat və həlak olmuş Azərbaycan Milli Qəhrəmanlarının ailə üzvlərinin pensiyasının baza hissəsi 20 manat artıb: “Hazırda belə pensiya alanların sayı 78 nəfərdir. Onların pensiyasının baza hissəsi hər bir ailə üzvi üçün 150 manatdan 170 manata qaldırıldı. 19 min nəfərdən çox şəhid ailə üzvü bu gün pensiya alır. Onların da pensiyasının baza hissəsi 18 manat 50 qəpik artırılıb. Böyük Vətən Müharibəsi əlilləri istisna olmaqla, I qrup müharibə əlilləri artım 20 manat, II qrup müharibə əlillərində 17 manat, III qrup müharibə əlillərində 15 manat təşkil edəcək”.

S.Müslümov bildirib ki, 2010-cu ilin sonunadək bu pensiyaların maliyyələşdirilməsi üçün əlavə 50 mln. manat vəsait tələb olunur. Pensiyaların maliyyələşdirilməsində heç bir problem yaranmayacaq. Artımların yaxın gələcəkdə də davam edəcəyini söyləyən S.Müslümov qeyd edib ki, bu artımdan sonra Azərbaycanda əmək pensiyalarının baza hissəsi 106 dollara çatıb.

DSMF başçısı müqayisə üçün qeyd edib ki, Ermənistanda minimum pensiya 21,6 dollar, Belarusda 82,1 dollar, Qazaxıstanda 124,2 dollar, Qırğızıstanda 17,1 dollar, Latviyada 91,7 dolar (bu, 20 ilədək stajı olanlara aiddir), Litvada 135,7 dollar, Moldovada 48,5 dollar, Rusiyada 90,2 dollar, Tacikistanda 18,3 dollar, Özbəkistanda 55,3 dollar, Ukraynada 89,8 dollar, Estoniyada 167 dollardır. Azərbaycan bu göstəriciyə görə MDB məkanında Qazaxıstandan sonra II yerdədir.

Fond sədri əlavə edib ki, 2010-cu ilin yanvar-iyul ayları ərzində məcburi dövlət sosial sığorta haqları üzrə büdcə proqnozu 90,8% səviyyəsində icra olunub. Qeyd edilən müddətdə 614,3 mln. manat məcburi dövlət sosial sığorta haqları daxil olub ki, bu da ötən ilin müvafiq dövrünə nisbətən 3,5% və ya 20,7 mln. manat çoxdur. Büdcə təşkilatları tərəfindən proqnoza 89,9% əməl olunub. Bu, ötən ilin müvafiq dövrünə nisbətən 5 mln. manat azdır. Qeyri-büdcə təşkilatlarından isə 350 mln. manat vəsait daxil olub. Bu da ötən ilin müvafiq dövrünə nisbətən 8% və ya 26 mln. manat çoxdur. Qeyri-büdcə təşkilatları proqnozu 92,5% səviyyəsində icra edib. Fondun xərclər proqnozu 99% yerinə yetirilib. Ümumilikdə, bütün xərclər üzrə ödəmələrin icrası 98,2% təşkil edib.