Sosial

Ana səhifə

Sosial

Qubada soyqırımı qurbanları məzarlığını yeni təhlükə gözləyir

01 sentyabr 2010 14:19 (UTC +04:00)

AMEA-nın Arxeologiya və Etnoqrafiya İnstitutunun aparıcı elmi işçisi, Quba soyqırımı ekspediyasının rəhbəri Qəhrəman Ağayev APA-ya bildirib ki, məzarlığın üstü şüşə örtüklə örtüldükdən sonra Fizika İnstitutu sabit hava şəraitinin yaradılması üçün həmin sahəyə azon qazı buraxacaq. Azon qazı buraxıldıqdan sonra isə sümüklərin çürüməsinin qarşısı alınacaq.
Ekspedisiya rəisinin sözlərinə görə, hazırda Quba Soyqırımı Memorial Kompleksinin təməl qoyma işlərinin aparılması, eyni zamanda məzarlığın yaxınlığından keçən Qudyalçayın məcrasını dəyişmək məqsədilə “Azərkörpü” Səhmdar Cəmiyyəti tərəfindən yeni bəndin tikilməsi çox müsbət haldır. Amma sümüklərin qorunulması üçün hazırda məzarlıqda heç bir iş görülmür: “Səhiyyə Nazirliyi Məhkəmə Tibbi Ekspertiza və Patoloji Anatomiya Birliyi tərəfindən məzarlıqdakı sümüklərin dərmanlanması prosesi aparılır. Ancaq məzarlıqda elə sümüklər var ki, onları götürmək mümkün deyil. Təcili olaraq, həmin sümüklər dərmanlanmalı, məzarlığın üstü şüşə örtüklə örtülməlidir. Əks halda, yağışlar başlayan kimi yenə də sürüşmə baş verə, nəticədə 2007-2008-ci ilin qış aylarında olduğu kimi quyulardan biri itə bilər. Onda məzarlıqdan əsər-əlamət qalmayacaq, orada güclə qoruduğumuz qalan bir quyu da itəcək. Məzarlıq da itərsə, biz soyqırımla bağlı heç kimə heç nəyi sübut edə bilmərik”.

Qeyd edək ki, Azərbaycan prezidenti İlham Əliyev ötən il dekabrın 30-da Quba şəhərində Soyqırımı Memorial Kompleksinin yaradılması haqqında sərəncam imzalayıb.
Kompleksin yaradılması məqsədilə 2009-cu ilin dövlət büdcəsində nəzərdə tutulmuş Azərbaycan Prezidentinin Ehtiyat Fondundan Quba rayon İcra Hakimiyyətinə 1 milyon manat ayrılıb.

Quba məzarlığı