Sosial

Ana səhifə

Sosial

Azərbaycanın birinci xanımının təşəbbüsü ilə Ulyanovsk şəhərində əsaslı təmir edilmiş məktəb binasının açılışı olub

02 sentyabr 2010 13:11 (UTC +04:00)

Bakı – APA. Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü ilə və şəxsən nəzarəti altında “Təhsilə dəstək” layihəsi çərçivəsində Rusiyanın Ulyanovsk şəhərindəki 78 nömrəli orta ümumtəhsil məktəbinin binası əsaslı təmir edilib. Sentyabrın 1-də - Rusiyada yeni dərs ilinin ilk günündə məktəb binasının açılışı olub.

Heydər Əliyev Fondundan APA-ya verilən məlumata görə, bu aksiya fəaliyyət istiqamətlərindən biri Azərbaycanın digər dövlətlərlə humanitar əlaqələrinin möhkəmlənməsinə, respublikamızın və xarici ölkələrin təhsil müəssisələri ilə sıx əməkdaşlığın genişlənməsinə, ölkəmizdə və onun hüdudlarından kənarda məktəblərin tikintisinə və yenidən qurulmasına kömək etmək olan Fondun fəaliyyəti ilə ahəngdar şəkildə uzlaşır.

Məktəbin rəsmi açılış mərasimində Ulyanovsk vilayətinin rəhbərləri, Azərbaycanın RF-dəki səfiri Polad Bülbüloğlu, Heydər Əliyev Fondunun icraçı direktoru Anar Ələkbərov, eləcə də Ümumrusiya Azərbaycanlılar Konqresinin Ulyanovsk regional bölməsinin nümayəndələri iştirak ediblər.

Mərasim iştirakçıları əvvəlcə Azərbaycanın ümummilli lideri Heydər Əliyevin və görkəmli siyasi xadim Nəriman Nərimanovun Ulyanovskda ucaldılmış abidələri önünə çiçəklər qoyublar. Təntənəli mərasimi məktəbin direktoru Gennadi Tsaryov açıb. O, Ulyanovsk sakinləri adından Heydər Əliyev Fonduna minnətdarlığını bildirib.

Ulyanovsk vilayətinin qubernatoru Sergey Morozov da çıxışında məktəbin əsaslı təmirini hərtərəfli dəstəkləmiş Fondun prezidenti Mehriban Əliyevaya şəxsən təşəkkür edib. Sonra S. Morozov M. Əliyevanın layiq görüldüyü Fəxri Fərmanı Heydər Əliyev Fondunun icraçı direktoru Anar Ələkbərova təqdim edib. M. Əliyeva həmin Fərmana Ulyanovsk vilayətinin ərazisində Azərbaycan mədəniyyətinin, Azərbaycan dilinin və milli ənənələrin qorunub saxlanmasına və inkişafına, xalqlar arasında dostluğun və əməkdaşlığın möhkəmlənməsinə böyük töhfələrinə görə layiq görülüb.

Mərasimdə P. Bülbüloğlu da çıxış edərək, M. Əliyevaya təşəkkürünü bildirib, Fondun çoxşaxəli fəaliyyəti və onun humanitar sahədə həyata keçirdiyi genişmiqyaslı layihələr barədə ətraflı söhbət açıb. Diplomat Ulyanovskdakı məktəbin yenidən qurulması layihəsinin həyata keçirilməsinə Fondun Rusiya nümayəndəliyinin rəhbəri Leyla Əliyevanın töhfəsini də xüsusi vurğulayıb.

RF Dövlət Dumasının Təhsil Komitəsinin sədri Gennadi Balıkin Heydər Əliyev Fondunun həyata keçirdiyi layihəni yüksək qiymətləndirib, bildirib ki, bu layihə Ulyanovsk vilayətinin təhsil sistemi, Azərbaycan və Rusiya xalqları arasında əlaqələrin inkişaf etməsi və möhkəmlənməsi üçün çox böyük əhəmiyyət kəsb edir.

Mərasimdə çıxış edən Heydər Əliyev Fondunun icraçı direktoru Anar Ələkbərov M. Əliyevanın tədbir iştirakçılarına xoş arzularını çatdırıb.

A. Ələkbərov Fondun məqsədləri və vəzifələri, onun istər ölkə daxilində, istərsə də xaricdə həyata keçirdiyi layihələr barədə də ətraflı məlumat verib.

Mərasimin rəsmi hissəsindən sonra tədbir iştirakçıları Azərbaycan tarixi və mədəniyyəti muzeyi ilə tanış olublar.

Qeyd edək ki, məktəbin əsaslı təmiri layihəsinin ümumi dəyəri 25 milyon rubla bərabərdir. Məktəbdə yaradılmış siniflərdə Ulyanovsk uşaqları Azərbaycan milli tətbiqi sənətinin bəzi növlərini öyrənə biləcəklər. Bundan başqa, Fond məktəbin 3 sinfini Azərbaycanda həyata keçirilən “1:1 gələcək üçün təhsil” layihəsi çərçivəsində istehsal edilmiş 20 ədəd “NEXUS” noutbuku ilə təchiz edib.

məktəb