Sosial

Ana səhifə

Sosial

Bakı şəhəri və ətraf qəsəbələrdə 2000-dən çox qanunsuz tullantı sahəsi aşkar edilib

07 sentyabr 2010 07:23 (UTC +04:00)

Bakı. Elnur Hüseynquluyev - APA-Economics. «Təmiz Şəhər» ASC-nin təşəbbüsü ilə paytaxtın ekoloji vəziyyətinin yaxşılaşdırılması və məişət tullantılarının rəsmi fəaliyyət göstərən Balaxanı tullantı poliqonuna daşınmasının təmin edilməsi məqsədilə bu ilin mart-aprel aylarında tullantı sahələrinin inventarizasiyası keçirilib.
«Təmiz Şəhər» ASC-dən «APA-Economics»ə verilən məlumata görə, inventarizasiya zamanı Bakı şəhəri və ətraf qəsəbələrdə qanunsuz fəaliyyət göstərən 2000-dən çox tullantı sahəsi aşkar edilib.
Cəmiyyətin İşçi Qrupu tərəfindən Bakı şəhərində mövcud olan qeyri-qanuni tullantı sahələrində keçirilmiş mütəmadi reydlər zamanı Suraxanı rayonunun Zığ və Dədə Qorqud qəsəbəsində, Binəqədi rayonunun “Baksol” adlanan sahəsində, Xocahəsən gölü sahilində, Xətai rayonunda kərpic zavodunun ətrafında və digər çoxsaylı qeyri-qanuni tullantı sahələrində müxtəlif qanun pozuntuları aşkar edilib. Belə ki, bərk məişət tullantılarının daşınması ilə məşğul olan qurumlar tullantıları Balaxanı poliqonuna daşımalı olduğu halda, bəzi sürücülərin tullantıları son məntəqəyə qədər daşımadığı, bununla da qanun pozuntusuna yol verildiyi müəyyən edilib.
Qeyri-qanuni tullantı sahələrinə tullantı daşıyan maşın sahibləri İşçi Qrup tərəfindən reydlərin keçirilməsi barədə məlumatlı olduğu üçün tullantıları qeyri-qanuni sahələrə axşam və gecə saatlarında daşımağa üstünlük verirlər. Aşkar edilmiş faktlarla bağlı müvafiq müəssisə və mənzil-kommunal təsərrüfat birliklərinə məlumat göndərilib, onlardan belə halların qarşısının alınması barədə tədbir görmək tələb olunub. Hazırda belə halların aradan qaldırılması məqsədilə müəyyən tədbirlər hazırlanır.