Sosial

Ana səhifə

Sosial

Mahmud Kərimov: “Azərbaycanda arxeoloji qazıntılar zamanı tapılan eksponatların, mədəni-tarixi abidələrin saxlanılması ilə üçün xüsusi fond yaradılmalıdır”

14 sentyabr 2010 09:08 (UTC +04:00)

APA-nın məlumatına görə, bu açıqlamanı jurnalistlərə Azərbaycan Milli Elmlər Akademiyasının (AMEA) prezidenti Mahmud Kərimov verib. AMEA prezidentinin sözlərinə görə, hazırda tapılan eksponatların, eləcə də mədəni-tarixi abidələrin saxlanılması ilə bağlı müəyyən yer problemləri var: “Əlbəttə arxeoloji tapıntıları saxlamaq üçün xüsusi fondlar olmalıdır. Bu fondlar müəyyən lazımi avadanlıqla təchiz olunmalıdır ki, onların saxlanılmasını təmin edə bilsin. Bu istiqamətdə artıq işlər aparılır, əminəm ki, nəticəsi yaxşı olacaq. Bizdə bu cür kiçik fondlar var, ancaq çox istərdik ki, respublika əhəmiyyətli böyük bir arxeoloji fond olsun və bütün tapıntılar orada yerləşdirilsin. Həm maraqlananlar gəlib baxmaq imkanı qazansınlar, həm də alimlər orada işləyə bilsinlər. Yəqin ki, gələcəkdə bu mümkün olacaq”.

M. Kərimov bildirib ki, problemin həll olunması üçün lazımi təkliflər hazırlanıb və yaxın zamanda müvafiq qurumlara təqdim olunacaq: “Əslində bu fondun yaradılması üçün əsas problem ərazidədir, çünki böyük ərazi, böyük bina, güclü avadanlıq olmalıdır. Bu iş böyük bir vəsait tələb edir. Hələlik biz təsəlli tapırıq ki, Arxeologiya İnstitutunun özünün bir neçə belə saxlama fondları var və eksponatlar hələlik orada yığılır”.

AMEA prezidenti onu da bildirib ki, abidələrin qorunması və saxlanılması üçün yeni bir konservasiya üsullarına başlanılıb və artıq tətbiq olunmaqdadır: “Artıq bu üsulla Ağsu abidələrinin bəzilərinin konservasiyasına başlayıblar. Bu çox vacib bir məsələdir. Azərbaycan mədəniyyəti ilə bağlı yeni məlumatlar əldə olunur. Abidələrin daha yaxşı tədqiq olunması üçün xarici mütəxəssislərin cəlb olunması və onların Azərbaycan arxeoloqları ilə birgə qazıntılarda iştirak etmələri yaxşı haldır. Yaponiya, Koreya, Almaniya, İspaniya, Amerika mütəxəssislər bizim mütəxəssislərlə birgə tədqiqatlarda iştirak edirlər. Bunun əhəmiyyəti ondan ibarətdir ki, Azərbaycan tarixi və mədəniyyətini xarici mütəxəssislər də tədqiq edir və dünyaya yayırlar”.