Sosial

Ana səhifə

Sosial

Bakıda Beynəlxalq Təhsil Sərgisi başlayıb - FOTO

Bakıda Beynəlxalq Təhsil Sərgisi başlayıb - <font color=red>FOTO</font>

07 oktyabr 2010 09:53 (UTC +04:00)

Bakı. İlhamə İsabalayeva - APA. Bu gün Bakıda Böyük Britaniyanın «ITE Group» şirkətinin Qafqazdakı rəsmi tərəfdaşı «İteca Caspian» şirkətinin təşkilatçılığı ilə IV Azərbaycan Beynəlxalq Təhsil və Karyera Sərgisi açılıb. APA-nın məlumatına görə, açılışda çıxış edən təhsil naziri Misir Mərdanov bildirib ki, sərgidə 15 ölkədən (Azərbaycan, Böyük Britaniya, Macarıstan, Almaniya, Yunanıstan, İspaniya, Kanada, Koreya, Latviya, BƏƏ, Rusiya, ABŞ, Türkiyə və İsveçrə) 96 təhsil strukturu iştirak edir.

Nazir deyib ki, Azərbaycanda 50-yə yaxın ali məktəb olsa da, onların yalnız ikisi sərgidə iştirak edir. Bunu çox pis hal kimi qiymətləndirən nazir Azərbaycanın ali məktəblərinin reklam işləri aparmadığını və belə reklama ehtiyac olduğunu deyib.

«İteca Caspian» şirkətinin direktoru Fərid Məmmədov isə bildirib ki, ziyarətçilərə kulinariyadan tutmuş, texnologiya sahələrinə qədər ən müxtəlif istiqamətlər üzrə 60-dan çox ödənişli və ödənişsiz fakültələr, kurslar və proqramlar təqdim olunur. Ümumilikdə, sərgidə məktəbəqədər və orta təhsil, ali təhsil müəssisələrinin proqramları, distansion təhsil sistemləri, xaricdə təhsil və tələbə mübadilələri üzrə proqramlar, elmi dərəcə əldə etmək üçün təhsil, işəgötürmə agentlikləri, karyeranın planlaşdırılması və inkişafı üzrə məsləhətlər, fakültativ təhsil və turizm üzrə proqramlar, xarici dil kursları və yay məktəbləri, yeni informasiya texnologiyaları, multimedia sistemləri, video və televiziya avadanlıqları və kompüterlər təqdim edilir. Bu il ilk dəfə olaraq, Türkiyənin Ankara, İstanbul və İzmir şəhərlərinin 14 təhsil müəssisəsini özündə birləşdirən türk milli universitetlər qrupu sərgidə iştirak edir. Sərgi çərçivəsində türk ali təhsil müəssisələrinin birində pulsuz təhsil almaq üçün lotereya tirajı da keçiriləcək.

Qeyd edək ki, Azərbaycanın Təhsil, Gənclər və İdman nazirlikləri sərgiyə fəal dəstək göstərir.

təhsil sərgisi