Sosial

Ana səhifə

Sosial

BDU-nun rektoru İranın Azərbaycandakı səfirini qəbul edib

30 noyabr 2010 12:29 (UTC +04:00)

Bakı. Pərvin Abbasov – APA. Bakı Dövlət Universitetinin (BDU) rektoru, akademik Abel Məhərrəmov İranın Azərbaycandakı səfiri Məhəmmədbağır Bəhramini qəbul edib. Bu barədə APA-ya BDU-nun mətbuat və informasiya şöbəsindən məlumat verilib.

A. Məhərrəmov BDU-nun İranın ali təhsil ocaqları ilə ikitərəfli əlaqələrindən bəhs edib. O deyib ki, son illərdə doktoranturada təhsil almaq istəyən iranlı tələbələrin sayı artıb ki, bu amil elmi müstəvidə əməkdaşlığın genişlənməsindən, əlaqələrin formalaşmasından xəbər verir.

Səfir M. Bəhrami isə Azərbaycanla İranın eyni sivilizasiyaya, mədəniyyətə, dinə malik, qardaş və dost ölkələr olduğunu vurğulayaraq əlaqələrin, xüsusən elm sahəsində münasibətlərin daha sıx olmasının vacibliyini diqqətə çatdırıb. O, hər iki ölkənin böyük universitetləri olan Bakı Dövlət Universiteti ilə Tehran Universitetinin daha sıx əməkdaşlığında, tələbə-müəllim mübadiləsində, birgə konfranslar və layihələrin həyata keçirilməsində maraqlı olduqlarını bildirib.

Dağlıq Qarabağ münaqişəsindən danışan diplomat əlavə edib ki, İran münaqişənin Azərbaycanın ərazi bütövlüyü çərçivəsində həllini istəyir.