Sosial

Ana səhifə

Sosial

Çin səfiri ölkəsinin Xarici İşlər Nazirliyi üçün yüksək səviyyəli kadrlar hazırladığına görə BDU rəhbərliyinə minnətdarlıq edib

01 dekabr 2010 13:57 (UTC +04:00)

Bakı. Pərvin Abbasov – APA. Bu gün BDU-nun rektoru, akademik Abel Məhərrəmov Çin Xalq Respublikasının Azərbaycandakı səfiri Çjan Yannyanı qəbul edib. Bu barədə APA-ya Mətbuat və informasiya şöbəsindən məlumat verilib.

Rektoru yenidən deputat seçilməsi münasibətilə təbrik edən səfir, BDU-da çalışan Çin müəllimlərinə göstərilən şəraitə, eyni zamanda Çinin Xarici İşlər Nazirliyi üçün yüksək səviyyəli kadrların hazırlanmasına görə minnətdarlıq edib.

İki ölkə arasında təhsil və elm sahəsindəki vəziyyətə toxunan akademik Abel Məhərrəmov bu günlərdə BDU və Anhoy Universiteti arasında bağlanmış sazişə toxunub. Məlum olub ki, BDU-nun nəzdində yaradılması nəzərdə tutulan Konfutsiya İnstitutunun açılışı gələn ilin aprel ayına təyin edilib. Anhoy Universiteti bu instituta hər il çin dili və mədəniyyəti üzrə yüksək səviyyəli mütəxəssislər göndərəcək, onu dərslik və dərs vəsaitləri, audiovizual materiallarla təmin edəcək. Bundan başqa, Konfutsiya İnstitutunun tələbələri hər il Anhoy Universitetində təcrübə keçəcəklər.

Sazişə əsasən BDU instituta abituriyentlərin qəbul edilməsini, burada keçiriləcək müxtəlif tədbirlərin reklamını, tədris və elmi tədqiqat seminarlarını, konfransları öz üzərinə götürür.

Hər il BDU-ya çin dili və ədəbiyyatı üzrə 10-15 nəfər tələbə daxil olduğunu bildirən rektor qeyd edib ki, tələbələrin çin dilini yaxşı mənimsəmələri üçün Çində təcrübə keçmələri vacibdir.

Qarabağ məsələsindən də danışılan görüşdə Çjan Yannyan ölkəsinin problemin Azərbaycanın ərazi bütövlüyü çərçivəsində həllinə tərəfdar olduğunu vurğulayıb.