Sosial

Ana səhifə

Sosial

«Sumqayıtın çirklənmiş ərazilərinin kadastrı»nın təqdimat mərasimi keçirilib

06 dekabr 2010 17:57 (UTC +04:00)

Bakı-APA. Sumqayıtın «Kimyaçı» Mədəniyyət sarayında «Azərikimya» İstehsalat Birliyi, ARDNŞ-in Ekologiya İdarəsi və Almaniya-Azərbaycan Əməkdaşlıq Cəmiyyəti nümayəndələrinin, həmçinin ekoloq-mütəxəssislərin iştirakı ilə «Sumqayıtın çirklənmiş ərazilərinin kadastrı»nın təqdimat mərasimi keçirilib.

Almaniyanın 30 ildən artıqdır ki, Sumqayıtla geniş tərəfdaşlıq əlaqələri qurmuş Lüdviqshafen şəhərinin Ekologiya Departamentinin dəstəyi, həmçinin Almaniya-Azərbaycan Əməkdaşlıq Cəmiyyətinin mütəxəssislərinin, onun Sumqayıt bölməsinin əməkdaşlarının birgə səyi nəticəsində bir-neçə il ərzində Sumqayıt şəhərində, onun sənaye zonasında, o cümlədən kimya müəssisələrinin ətraf ərazilərində aparılmış ciddi analizlərin, müşahidə və yoxlamaların nəticəsi olaraq hazırlanmış kadastrla yaxından tanış olan tədbir iştirakçıları şəhərin müxtəlif zərərli maddələr və çöküntülərlə zəhərlənməsinin müəyyənləşdirilməsi sahəsində kadastr qrupu üzvlərinin əməyini yüksək qiymətləndirib, təqdim olunan layihə ilə bağlı öz fikir və mülahizələrini bildiriblər.

Qeyd edilib ki, 19 il əvvəl Azərbaycanın müstəqillik əldə etməsi Sumqayıt və Lüdviqshafen şəhərlərinin əlaqələrinin daha da intensiv xarakter almasına və alman ekoloqların Sumqayıtın ekoloji vəziyyətinin yaxşılaşdırılması istiqamətində fəaliyyətinin genişlənməsinə səbəb olub. Son illərdə Almaniya-Azərbaycan Əməkdaşlıq Cəmiyyətinin Sumqayıt ofisinin də yaradılması bu sahədə aparılan işlərin daha intensiv, ciddi və səmərəli olmasına öz müsbət təsirini göstərib.

Tədbirdə Sumqayıtın çirklənmiş əraziləri ilə bağlı kadastrın tərtibatı, toplanılan faktların zənginliyi, aparılmış müşahidələrin çoxluğu nümayiş etdirilən kadrlarda daha aydın şəkildə diqqətə çatdırılıb. Kadastrın hazırlanmasında Almaniyanın Lüdviqshafen və digər şəhərlərində ekoloji vəziyyətin yaxşılaşdırılması ilə bağlı əldə olunmuş zəngin təcrübə də mühüm rol oynayıb.

Bildirilib ki, Sumqayıtın çirklənmiş ərazilərinin kadastrı hazırlanarkən həmin sahələr yerdən və havadan izlənilərək öyrənilib və əldə olunmuş nəticələr xüsusi xəritələrə, sonra isə kompüterə köçürülüb. Həm də diqqətəlayiqdir ki, çirklənmiş ərazilərin ətraf mühitə vurduğu zərər, yaratdığı təhlükə maksimum dəqiqliyi ilə qeydə alınıb.

Qeyd olunub ki, tədqiq olunun ərazilərin kadastrı hazırlanarkən həmçinin arxiv materiallarından, əsasən də köhnə şəkillərdən istifadə edilib, hətta ərazilərin tarixi də öyrənilib. Sonda çirklənmiş ərazilər əmsallaşdırılıb, kodlaşdırılıb və nömrələnərək xüsusi kompüter sisteminə daxil edilib.

Bütövlükdə Sumqayıtın ekoloji durumunun yaxşılaşdırılmasını qarşıya məqsəd qoymuş Almaniya-Azərbaycan Əməkdaşlıq Cəmiyyətinin ekoloq və ekspertləri şəhərin çirklənmiş ərazilərinin kadastrının hazırlanmasına çox ciddi yanaşaraq, həmin ərazilərin müəyyənləşdirilməsi ilə yanaşı onların ətraf mühitə, həmçinin Xəzərin sularına yaratdığı təhlükə dərəcəsini araşdıraraq, mövcud vəziyyətin yaxşılaşdırılması üçün müəyyən təkliflər paketi də hazırlayıblar.

Qeyd olunub ki, çirklənmiş ərazilərin kadastrı xüsusi proqram əsasında tərtib edildiyindən Sumqayıtın ekoloji vəziyyəti ilə bağlı informasiyaları dəqiqləşdirmək, dəyişikliklər baş verdikdə onları yeni göstəricilər əsasında təzələmək asanlıqla mümkün olur. Bütün ekoloji göstərici və materialların kompüter sisteminə daxil edilməsi bu sahədə aparılacaq gələcək işlər üçün mühüm əhəmiyyət kəsb edəcək.

Təqdimat mərasimində həmçinin bildirilib ki, kadastrın hazırlanmasına başlanıldığı ilkin mərhələdə çirklənmiş ərazilər Sumqayıtda çoxluq təşkil edərək şəhərin müxtəlif ərazilərində ekoloji gərginliyin artma tendensiyası müşahidə edilsə də, son dövrlərdə ətraf mühit üçün təhlükəli olan müəssisə və qurğuların fəaliyyətinin dayandırılması, yeni və müasir təmizləmə qurğularının tətbiqi, şəhərin bir çox məhəllə və mikrorayonlarında, həmçinin kimya müəssisələrinin sıx yerləşdiyi sənaye zonasında yaşıllaşdırma işlərinin genişləndirilməsi, əhalinin ekoloji baxımdan maarifləndirilməsi şəhərin ekoloji vəziyyətinin nisbətən yaxşılaşmasına səbəb olub.

Bu baxımdan «Azərikimya» İstehsalat Birliyinin Etilen-polietilen zavodunda aparılan əsaslı təmirdən sonra ətraf mühitə və Xəzər dənizinə atılan tullantıların azaldılması, kimya müəssisələrinin ərazilərində və onların ətraflarında geniş yaşıllıq sahələrinin yaradılması da əvvəlki illərə nisbətən Sumqayıtın ab-havasının yaxşılaşmasında mühüm mərhələ təşkil edib.
Ekoloji xəritə-kadastrın müəllifləri və digər mütəxəssislər ətraf mühitin çirklənməsinə qarşı mübarizədə, kimya müəssisələrinin ərazilərində çirklənmiş sahələrin müəyyən edilməsində «Azərikimya» rəhbərliyinin onlara yardım göstərməyə hazır olmasından razılıq ifadə ediblər və həmin ərazilərin analitik xəritəsinin də kadastra daxil edərək, bütünlükdə işi tezliklə və tam şəkildə başa çatdıracaqlarını bildiriblər.

Sumqayıtın ekologiyasının saflaşdırılmasında mühüm əhəmiyyət kəsb edəcək kadastrın açıq və maraqlı diskussiya, sual-cavab şəklində davam etdirilən müzakirəsi ətrafında çıxış edən «Azərikimya» İstehsalat Birliyinin, ekologiya ilə əlaqəli bir sıra qeyri-hökumət təşkilatlarının nümayəndələri təqdim olunan layihənin əhəmiyyətini qeyd edərək, bir sıra konkret təkliflər irəli sürüblər.