Sosial

Ana səhifə

Sosial

Ombudsmanın təşəbbüsü ilə ekoloji hüquqlarla bağlı tədbir keçirilib

07 dekabr 2010 12:22 (UTC +04:00)

Bakı-APA. Ekologiya və Təbii Sərvətlər naziri Hüseyn Bağırov Ombudsmanın uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsinin nəzdində Liderlik Məktəbinin qonağı olub. Ombudsman Aparatının mətbuat xidmətindən APA-ya verilən məlumata görə, bununla bağlı keçirilən tədbirdə Ombudsman Aparatının, Ekologiya və Təbii Sərvətlər Nazirliyinin əməkdaşları, valideynlər və Bakı məktəblərinin şagirdləri iştirak ediblər. İnsan Hüquqları üzrə Müvəkkil Elmira Süleymanova çıxışında Ombudsmanın fəaliyyətində digər hüquqlarla yanaşı, ekoloji hüquqların müdafiəsinin də mühüm yer tutduğunu diqqətə çatdırıb.
“Ekologiya ili” və 18 iyun – Milli İnsan Hüquqları Günü münasibətilə Müvəkkil tərəfindən “İnsan hüquqları və ətraf mühit: iqlim dəyişikliyinin hüquqi və etik aspektləri” mövzusuna həsr edilmiş Ombudsmanların VIII Bakı Beynəlxalq konfransının keçirildiyi, YUNESKO-nun dəstəyi, Ekologiya və Təbii Sərvətlər, Fövqəladə Hallar nazirlikləri ilə əməkdaşlıqda təşkil olunmuş toplantıda Azərbaycan Ombudsmanının çoxsaylı təkliflərinin də yer aldığı Bakı Bəyannaməsinin qəbul olunduğu bildirilib. Ekologiya və təbii sərvətlər naziri Hüseyn Bağırov ekoloji hüquqların təmini və müdafiəsi istiqamətində Ombudsmanın fəaliyyətini yüksək dəyərləndirib, uşaqlar üçün bu maarifləndirici tədbirin təşkilinə görə ona təşəkkürünü bildirib.
Nazir bu gün ətraf mühitin saflığının qorunmasının, insanların sağlam mühitdə yaşamasının təmin edilməsinin dünyada önəm verilən məsələlərdən olduğunu, ölkə əhalisinin bu hüquq və vəzifələrinin həyata keçirilməsində rəhbərlik etdiyi qurumun mühüm iş apardığını deyib.
Müvəkkil və nazir uşaqların ekoloji hüquqlar və təbiətin mühafizəsi ilə bağlı çoxsaylı suallarını ətraflı cavablandırıblar.