Sosial

Ana səhifə

Sosial

Macarıstanda 20 Yanvar hadisələri anılıb

20 yanvar 2011 15:30 (UTC +04:00)

Bakı. Ramil Məmmədli – APA. Azərbaycanın Macarıstandakı səfirliyi bu ölkənin Komarom şəhər Bələdiyyəsi ilə birgə 20 Yanvar faciəsinin 21-ci ildönümünə həsr olunan tədbir keçirib.
Səfirliyin mətbuat xidmətindən APA-ya verilən məlumata görə, tədbiri giriş sözü ilə Komarom şəhərinin meri Molnar Atilla açaraq, Macarıstan və Azərbaycan xalqlarının tarixi yaxınlığı, hər iki xalqın müstəqilliyə doğru yolda eyni təhdidlərlə üzləşdiyini və bu mübarizədə çoxsaylı qurbanlar verdiyini, hazırda isə iki ölkə arasında səmərəli əməkdaşlığın qurulduğunu vurğulayıb.

Azərbaycanın Macarıstandakı səfiri Vilayət Quliyev isə çıxışında 20 Yanvar faciəsinin səbəblərindən danışıb. O, keçmiş sovet rəhbərliyinin bir vaxtlar Macarıstanda və Çexoslovakiyada olduğu kimi, Azərbaycanda da qəddar və amansız üsullarla xalqın azadlıq istəyinin qarşısına sədd çəkmək istədiyini, lakin niyyətinə çatmadığını bildirib. Səfir 1990-cı il 20 yanvar hadisəsinin Sovet İttifaqı üçün sonun başlanğıcına çevrildiyini, sovet imperiyasının süqutunu sürətləndirdiyini də qeyd edib.

Tədbir iştirakçılarına Ermənistanın Azərbaycana qarşı yürütdüyü işğalçılıq siyasəti və bunun nəticəsində regionda yaranmış böhranlı vəziyyət haqqında da məlumat verilib. Budapeşt və Bakı faciələrinin qurbanlarının xatirəsi bir dəqiqəlik sükutla yad edilib. Toplantı çərçivəsində Macarıstan Hərb Tarixi Muzeyinin Komarom filialında “Budapeşt-1956 – Bakı-1990: Azərbaycan və Macarıstan tarixinin faciəvi səhifələri arasında paralellər” adlı sərgi də təşkil olunub. Sərgidə SSRİ qoşunlarının 1956-cı ilin oktyabrında Budapeştdə, 1990-cı ilin yanvarında isə Bakıda törətdikləri vəhşilikləri əks etdirən fotolar, rəsm əsərləri, kitab və bukletlər həmçinin, 20 yanvar faciəsinə həsr edilən sənədli film nümayiş etdirilib.